Ndërkohë që ish Drejtorët e Autoritetit Rrugor po provojnë burgun, të akuzuar për shpërdorim detyre e abuzim me fondet e rrugës Elbasan-Gjinar, gazetari Fatmir Popja ka shkuar me kamerën e News 24 të shohë se në ç’gjendje është kjo rrugë, për të cilën u vunë në dispozicion më shumë se 5 miliardë lekë, raporton “BalkanWeb”.
Banorët e zonës duket se nuk e kanë gëzuar asnjëherë këtë rrugë. Ata tregojnë për kamerën e News 24 vuajtjet e përditshme dhe mundimin për të kaluar në rrugën e vetme që i lidh me qytetin e Elbasanit.
Banorët thonë se e kanë rikonstruktuar edhe vetë segmentin e shembur në Shelcan, por siç mund të shihni edhe nga pamjet, vetëm shenjat e rrugës që nuk duken.
“Shoqëria kërkon që të zhvillohet, vendi kërkon të zhvillohet. Shteti të vërë dorë, e kanë bërë si mos më keq”,- shprehet njëri nga banorët për News 24.
“Këtu nuk është vënë më dorë që kur është shembur, e kemi ndërtuar edhe me forcat tona, por njësoj u bë”,- thotë një tjetër.
“Është katastrofë, ne nuk dimë ku të vemi”,- thotë një tjetër.
Kujtojmë se rruga Elbasan-Gjinar është një nga rrugët më të rëndësishme të Qarkut të Elbasanit, e cila është ndërtuar në vitin 2011, por një vit më vonë shfaqi probleme të shumta sa i takon cilësisë së punimeve të saj. Një segment prej 1 km të kësaj rruge u shemb në fshatin Shelcan në vitin 2012, duke izolur 10 mijë banorë.
Pas hetimit prej dy vitesh rezultoi se me këtë rrugë është abuzuar, duke çuar në pranga disa zyrtarë të lartë, Andi Tomën, ish-drejtori i Përgjithshëm i Rrugëve të vitit 2008-2013 (në kohën kur qeveriste PD) dhe Ish Drejtori i Autoritetit Rrugor Shqiptar, Dashamir Xhika nga radhët e LSI-së. Në gjithë gjatësinë e prej 23 km të rrugës problem është edhe mungesa e sinjalistikës.
(m.a/BalkanWeb)
