Kreu demokrat Lulzim Basha ka tentuar dje të qetësojë demokratët pas sulmeve që nisën për uljen në tryezë me Partinë Socialiste. Të shumtë ishin ata që e cilësuan takimin për reformën zgjedhore si pazarin e radhës dhe një prapakthehu të Partisë Demokratike.
Deri dje Basha shprehej se nuk ulej në një tryezë me hajdutin e votave, por Gjiknuri ishte në tryezën e së martës. Gjatë një konferencë për mediat, Basha tentoi të bindë demokratët se ulja në tryezë me PS nuk ka asnjë pazar në mes. Basha garantoi edhe një herë qytetarët dhe simpatizantët e PD se qëllimi i tij është vetëm një, largimi i Edi Ramës nga posti i kryeministrit.
“Garantoj qytetarët shqiptarë, demokratët mbështetësit e opozitës, të zhgënjyerit nga partia e tyre, se procesi ka një dhe vetëm një qëllim, të kthejë lirinë e votës, që çdo shqiptar të vendosë për qeverinë që do, Parlamentin që do, e ti shkarkojë ato me votë, siç ndodh kudo në rajon. Kjo betejë nuk bëhet as për karriget tona, as fatet tona politike. Sakrifica e mandateve të djegura, solli atë që çdo kush mund ta konsideronte të pamundur, vetëndërgjegjësimin e Perëndimit, se Shqipëria ka nevojë për ndihmë. Mos kini asnjë dyshim, është vetëm fillimi i një beteje që do të konsiderohet e fituar kur të kemi një qeveri e Parlament të dalë nga vota e qytetarëve. Për opozitën objektivi politik është i qartë, largimi një orë e më parë i kësaj qeverie me zgjedhje të lira e të ndershme, që do i paraprijë një reformë zgjedhore”, tha Basha.
Basha i përgjigjet akuzave të Topallit
Ish-kryeparlamentarja Jozefina Topalli ishte një prej zërave më kritikë për marrëveshjen PS-PD-LSI. Ajo theksoi dy ditë më parë se kreu i PD-së, Lulzim Basha pranoi të ulej në një tryezë me Ramën dhe Gjiknurin, duke e lidhur me faktin e pushimit të çështjes nga gjykata për lobimin rus. Por kreu demokrat iu përgjigj këtyre akuzave, duke theksuar se këta janë njerëz të Edi Ramës dhe se i shërbejnë këtij të fundit. “Nuk janë kritikë të mi por përftues të Edi Ramës. Janë njerëz që kanë vënë në funksion çdo gjë ndaj Edi Ramës. Prandaj nuk meritojnë asnjë përgjigje. Pyetjes suaj do i përgjigjem. Prej llumit të dhjetorit faktori ndërkombëtar ka ushtruar presion ndaj mazhorancës për të pranuar tre kushtet e opozitës. Nëse takimi do zhvillohej nesër këtë nuk mund ta thonim në orët e fundit për shkak të tentativave për ta zvarritur”, tha Basha.
Basha përjashton dorëheqjen
Po ashtu, kreu demokrat përjashtoi në mënyrë kategorike mundësinë e dorëheqjes nga drejtimi i partisë. Basha tha se vendi ndodhet në një krizë të thellë, duke shtuar se ka për detyrë ti japë fund përgjithmonë kësaj krize politike. “Shikoni, e di unë që ka disa njerëz që merak nuk kanë nëse do të ndryshojë apo jo Shqipëria, por a do të japë apo s’do të japë unë dorëheqjen. Por nuk mendoj se ky është momenti apo vendi për të kënaqur kureshtjet apo thrillet e tyre. Sot Shqipëria është në krizë dhe detyra ime është të bëj gjithçka në emër të opozitës së bashkuar, në emër të Partisë Demokratike për t’i dhënë fund kësaj krize, për t’u dhënë shqiptarëve instrumentin për të dalë nga kjo krizë dhe për të punuar bashkë me ta që edhe Shqipëria, që i ka të gjitha mundësitë të mos jetë kështu, sepse nuk ka pse të jetë kështu, por të jetë një vend me ekonomi funksionale, me konkurrencë ekonomike, me konkurrencë politike, me të ardhme për fëmijët e saj, për rininë e saj. Kjo është axhenda ime sot. Ëndrra dhe makthet e të tjerëve nuk janë sot fare as në radarin, as në preokupimet e mia dhe të bashkëpunëtorëve të mi”, tha Basha.
