Batërdia që kanë bërë gjyqtarët dhe prokurorët në sistemin e drejtësisë ka qenë në vëmendjen e qeverisë gjatë kohës së fundit. Gjatë një interviste për mediat, ministrja e Drejtësisë Etilda Gjonaj foli për shkeljet e mëdha që kanë bërë njerëzit e drejtësisë, duke i akuzuar për shpërdorim detyre. Gjonaj iu referua rastit të lirimit nga burgu të të dënuarit me burgim të përjetshëm Endrit Dokle, duke deklaruar se gjyqtarët dhe prokurorët po përfitojnë nga situata transitore e reformës.
“Ky rast po raste të ngjashme të lirimeve nga gjykatat duhen parandaluar. Disa gjyqtarë dhe prokurorë kanë shfrytëzuar situatën tranzitore të reformës. Elementë të tillë në sistemin e drejtësisë cenojnë besimin e publikut. Unë kam kërkuar pikërisht ato masa që janë bërë publike. Ende nuk kemi marrë përgjigje. Megjithatë u kemi lënë kohë që të marrin masa për të reaguar”, tha ministrja e Drejtësisë.
Gjonaj tha se ka kërkuar nga KPK që këta gjyqtarë apo të tjerë që kryejnë shkelje me veprimet apo mosveprimet e tyre t’i kalojnë me prioritet në skanimin e procesit të vetingut. “Kodi Penal i parashikon qartësisht kriteret për përtimin e lirimit me kusht të të dënuarve me burgim të përjetshëm. Ministria e Drejtësisë ka kryer një hetim të plotë të dokumentacionit. Edhe në vitin 2018 ka pasur të njëjtin trajtim ligjor mënyra se si gjyqtarja e ka përdorur Kodin Penal dhe e ka interpretuar dhe kjo në konsideratat tona është në shkelje të rëndë të Kodit Penal”, tha Gjonaj.
Ministrja theksoi se qeveria ka propozuar disa ndryshime për ligjin për statusin e gjyqtarëve dhe prokurorëve me qëllim ndëshkimin e këtyre gjyqtarëve dhe prokurorëve. Ministrja e Drejtësisë Etilda Gjonaj u shpreh se me miratimin e ligjit anti-KÇK asnjë gjyqtar dhe prokuror nuk do të shpëtojë pa u lagur nga aferat korruptive ku janë përfshirë.
“Ndërkohë, Kuvendi i Shqipërisë do të shqyrtojë dhe shpresoj miratojë, me urgjencë, në ditët e ardhshme propozimet e bëra nga qeveria në kuadrin e paketës së reformës në drejtësi për masat ndaj gjyqtarëve dhe prokurorëve (e ashtuquajtura paketa anti-KÇK), e cila, padyshim do t’u japë institucioneve të reja të drejtësisë, instrumente të rinj efikasë, për të reaguar ndaj kësaj kategorie gjyqtarësh dhe prokurorësh, të cilët, duhet të përgjigjen penalisht për vendimet e tyre, dhe jo ta kenë vendin në sistemin e drejtësisë”, tha Gjonaj.
