Ndërkombëtarët i kanë cilësuar zgjedhjet e 25 prillit në vend si të mirëorganizuara. Përfaqësuesi i Lartë i Politikës së Jashtme, Josep Borrell dhe Komisioneri për Zgjerimin, Oliver Varhelyi në një deklaratë thanë se këto zgjedhje u mbajtën në përputhje me rekomandimet e BE.
Po ashtu ata u kanë bërë thirrje palëve politike që të respektojnë edhe njohin rezultatin e zgjedhjeve dhe se çdo pretendim për blerje vote duhet të adresohet në Komisionin Qendror të Zgjedhjeve në mënyrë që rastet të heton plotësisht. “Ne i përgëzojmë të gjithë ata që kontribuuan me anë të votës së tyre. Zgjedhjet u mbajtën duke zbatuar një kornizë të re zgjedhore, të miratuar në përputhje me rekomandimet e OSBE/ODIHR.
Sipas gjetjeve dhe konkluzioneve paraprake të Misionit të Vëzhgimit të Kufizuar të Zgjedhjeve të OSBE/ODIHR, zgjedhjet parlamentare ishin përgjithësisht të organizuara mirë nga administrata zgjedhore. Çdo parregullsi e pretenduar duhet të sillet në vëmendje të Komisionit Qendror të Zgjedhjeve dhe autoriteteve të tjera kompetente, dhe rastet duhet të hetohen siç duhet, përfshirë blerjen e votës”, thuhet në deklaratën e tyre. Borrell dhe Varhelyi shprehen se Bashkimi Europian do të vijojë që të ndjekë nga afër të gjithë procesin deri në mbylljen përfundimtare të tij.
Ndër të tjera, në deklaratë theksohet vendi duhet që të vijojë më tej me zbatimin e reformave të nevojshme që do e çonin vendin drejt Bashkimit Europian. “Ashtu si me aktivitetet e vëzhgimit diplomatik në ditën e zgjedhjeve nga Delegacioni i BE dhe përfaqësuesit e Shteteve Anëtare, BE do të vazhdojë të ndjekë nga afër zhvillimet elektorale deri në certifikimin përfundimtar të rezultateve.
Periudha e tranzicionit deri në përurimin e parlamentit dhe qeverisë së re nuk duhet të mbajë përpjekjet e vazhdueshme për të zbatuar reformat e nevojshme. Ne do të dëshironim që vendi të hynte në fazën tjetër të procesit të pranimit, me Konferencën e parë Ndërqeveritare për fillimin e negociatave të zhvilloheshin sa më shpejt të ishte e mundur”, thuhet në deklaratë.
