I bashkon jo vetëm e kaluara, por edhe e tashmja. Dy aktorët e mirënjohur, Tinka Kurti dhe Mirush Kabashi, të cilët mbajnë titullin “Nderi i Kombit”, i bashkon epoka e tyre e lavdishme, epokë e cila mbajti shqiptarët të mbërthyer para ekranit të vetëm, por pa ia imponuar një gjë të tillë.
Ata ndonjëherë bëhen bashkë, për të kujtuar diçka nga e kaluara e tyre.
Sot edhe pse ka shumë më tepër ekrane dhe mundësi, edhe pse shqiptarët mund të eksplorojnë botën në një ditë, vështirë të gjejnë një aktor tjetër shqiptar të përmasave të tyre.
Aktorja e madhe shqiptare Tinka Kurti ka interpretuar sa e sa role, që mbetën në memorien e shqiptarëve.
Nderi i Kombit, ajo është një nga ikonat e kinematografisë sonë.
Bëri art në kohë të vështira, sepse ishte artiste e lindur. Për vlerat e larta njerëzore dhe qytetare që përcolli në tërë vitet e karrierës së saj dhe më pas, Tinka Kurti vlerësohet vazhdimisht nga publiku i gjerë mbarëshqiptar.
Tinka Kurti lindi më 17 dhjetor 1932 në Sarajevë. U ngjit për herë të parë në skenë kur ishte vetëm 14 vjeç. Për disa vjet u aktivizua në teatrin amator në Shkodër.
Si rrallëkush, Kurti rikonfirmon talentin e saj edhe në kinema, duke interpretuar në rreth 35 filma artistikë, duke filluar me filmin e parë të metrazhit të gjatë, “Tana”, më 1958-n.
Të paharruar kanë mbetur Nënë Pashako tek “Yjet e netëve të gjata” (1972), halla te “Çifti i lumtur” (1975), sinjorina Mançini te “Vajzat me kordele të kuqe” (1978), gjyshja te “Zemra e nënës”.
Ajo mban titullin “Nderi i Kombit”. Këtyre çmimeve u shtohen edhe vlerësime të tjera të rëndësishme, si medalja “Mjeshtër i Madh i Punës”, akorduar nga Presidenti i Republikës.
Mirush Kabashi lindi më 17 prill 1948 në Shkodër dhe është rritur në Durrës. Është një aktor shqiptar. Origjina e tij është nga Gjakova. Ai është aktor i rreth 100 roleve, në teatër dhe filma. Shpesh ka qenë edhe prezantues i aktiviteteve të shumta artistike.
Gjithashtu, Kabashi është cilësuar si një nga interpretuesit më të mëdhenj të poezisë në Shqipëri. Ai ka dhënë një kontribut të madh në filmografinë shqiptare.
E ndërsa një pjesë të jetës së tij ia ka kushtuar edhe teatrit me rolet e tij të larmishme, ku ndër to më i veçanti ka mbetur ai i Sokratit tek “Apollogjia e fundit e Sokratit”.
Mirush Kabashi, i cili në fund të vitit 2014 u nderua me titullin e lartë “Nderi i Kombit”, më parë kishte titujt “Artist i Merituar”dhe “Mjeshtër i Madh i Punës”
