Rikthehen tensionet dhe përplasjet mes ishit të përjetshëm Sali Berisha dhe kryetarit të Partisë Demokratike, Lulzim Basha. Të mërkurën në orën 18:00 kryedemokrati Basha zhvilloi një takim në selinë blu me ish-deputetët, anëtarët e Kryesisë dhe kryetarët e degëve të PD të zonave që u prekën nga tërmeti i 26 nëntorit. Por gazeta ka mësuar se kjo mbledhje është shoqëruar me debate të forta, ndërsa protagonist ka qenë ish-kryeministri Berisha.
Sipas informacioneve, mësohet se shkak i këtyre përplasjeve ka qenë braktisja e aksionit opozitar dhe protestat anti-qeveritare nga ana e Bashës. Mësohet se Berisha i ka kërkuar llogari Bashës se përse nuk e ka ashpërsuar retorikën kundër kryeministrit Edi Rama dhe pse nuk ka thirrur qytetarët në protestë, në një kohë që këtë gjë e kishte premtuar qysh në verë. Po ashtu, mësohet se ish-kryeministri gjatë mbledhjes ka kërkuar nga lideri demokrat që të bëjë një koordinim me presidentin Ilir Meta, duke mos e lënë këtë të fundit të vetëm në luftën e nisur me qeverinë. Në këtë pikë, Berisha është shprehur se është momenti më i mirë që opozita dhe Meta të koordinohen me njëra-tjetrën, duke protestuar kundër qeverisë, pasi sipas tij, kjo është e vetmja rrugë për të rrëzuar qeverinë.
Berisha i kërkon Bashës rrëzimin e Ramës
Por në kushtet kur qeveria po dështon në përballimin e situatës pas tërmetit të 26 nëntorit, mësohet se ish-kryeministri Sali Berisha ka kërkuar nga Lulzim Basha që të prishë “armë pushimin” e këtyre ditëve dhe të nisë sulmet ndaj mazhorancës qeverisëse. Në këtë pikë, mësohet se ish-lideri demokrat ka kërkuar që pas festave të fundvitit, më konkretisht në janar, duhet të rikthehen fuqishëm protestat anti-qeveritare, ndërsa ia ka bërë të qartë Bashës se ky është momenti i duhur për të rrëzuar Ramën. Madje, kërkesën e tij Berisha e ka lidhur edhe me kohën kur në Shqipëri 30 vjet më parë u rrëzua diktatura komuniste, duke i vëmë si ultimatum Bashës që të lëvizë gjithë gurët dhe asetet e opozitës, në mënyrë që kryeministri Rama dhe qeveria e tij të rrëzohen brenda muajit shkurt. Burime nga mbledhja i pohuan gazetës se Berisha është shfaqur tejet nervoz që Basha nuk organizoi asnjë ceremoni në 8 Dhjetor të këtij viti, e cila është një ditë simbolike për demokratët, pasi 29 vite më parë në këtë ditë nisi dhe mobilizimi i demokratëve kundër diktaturës.
Kështu që, i ndodhur përpara kësaj situate mësohet se Berisha ka kushtëzuar kryedemokratin Basha, duke i vënë si afat 20 shkurtin e vitit 2020 për rrëzimin e qeverisë. Mësohet se këtë ultimatum Berisha e ka lidhur me 20 shkurtin e vitit 1990, kohë kur u rrëzua përmes protestave diktatura komuniste. Nga ana tjetër, mësohet se Basha ka qëndruar indiferent ndaj kërkesave dhe ultimatumeve të Berishës, ndërsa iu ka kërkuar vartësve të vetë të zbresin në terren, duke iu qëndruar pranë njerëzve të prekur nga tërmeti i 26 nëntorit.
Njerëz pranë Berishës kërkojnë revolta
Megjithatë, mësohet se në të njëjtën linjë me ish-kryeministrin Berisha janë rreshtuar edhe ish-deputetët pranë tij, të cilët ka kërkuar nga kryedemokrati Basha që të rrisë dozën e reagimit kundër qeverisë dhe t’iu rikthehet protestave. Ndërkohë, ajo që e vërteton se njerëz pranë Berishës kërkojnë përmbysjen e qeverisë përmes revoltave, ka qenë kryetarja e Bashkisë së Shkodrës në detyrë, Voltana Ademi, e cila teksa ka kujtuar dje 29-vjetorin e rrëzimit të bustit të diktatorit, deklaroi se Shqipëria ka nevojë për një dhjetor të dytë. “Shqiptarët sot po përballen me një tjetër sistem, me një tjetër regjim, të ngjashëm me atë që rrëzuam në 22 mars 1992. Me dhimbje e them se Shqipëria ka nevojë për një dhjetor të dytë, për një përpjekje tjetër më të fortë. Ka nevojë për gjithë shqiptarët, në mënyrë që të mos jemi në një tjetër diktaturë dhe të mos reagojmë kur ndoshta do të jetë tepër vonë”, deklaroi Ademi. /Rigels Seliman
