Partia Demokratike duket se në shtator do të nisë një aksion politik të ashpër kundër qeverisë. Pas deklaratave të bëra nga ish-kryeministri Sali Berisha dy ditë më parë, i cili duke u ndalur tek protestat në Rumani u bëri thirrje qytetarëve shqiptarë që të ngrihen në shtator kundër qeverisë, një gjë të tillë e kanë mbështetur edhe deputetët demokratë. Edhe pse kreu demokrat, Lulzim Basha ka deklaruar prej kohësh se është pro protestave paqësore, duket se pas rritjes së presioneve ka vendosur që të marrë një aksion të gjithanshëm politik kundër qeverisë në shtator.
Deputetja e PD, Orjola Pampuri, në një reagim të dhënë dje për gazetën, teksa u rreshtua krah deklaratës së ish-kryeministrit Berisha deklaroi se vetëm një aksion i fuqishëm mund të shkund themelet e kësaj qeverie. Ajo tha se ky vend nuk e meriton këtë realitet dhe këtë qeveri pasi pas pesë vitesh në pushtet bëmat e mazhorancës nuk kanë të sosur.
“Sigurisht që mbështes e jam në krah të çdo vendimi të liderit historik dhe kryetarit të PDSH. Njëkohësisht pas pesë vitesh në pushtet, bëmat e kësaj qeverie nuk kanë të sosur, besimi tek qytetarët, për këtë qeveri ka rënë totalisht. Besimi se do të ketë zgjedhje të lira e të ndershme me këtë kryeministër ka rënë, ç’ka do të thotë që vetëm një aksion i fuqishëm mund të shkunde themelet e kësaj qeverie mafioze, dhe mund të shkëpusë lidhjet e bandave të krimit e të drogës me pushtetin.
Ky vend dhe qytetarët e tij nuk e meritojnë këtë realitet e këtë qeveri, e cila të vetmen mundësi krahasimi që mund të ketë është me atë të regjimit diktatorial te 50 viteve te komunizmit ne Shqipëri”, tha deputetja Pampuri. Por në të njëjtën linjë është rreshtuar dhe deputeti Luçiano Boçi. Deputeti Boçi theksoi për gazetën se shtatori është paralajmëruar si momenti i rinisjes së një aksioni opozitar duke përfshirë këtu dhe reagime të forta kundër qeverisë.
“Shtatori është paralajmëruar si moment i rinisjes së një aksioni intensiv opozitar duke përfshirë dhe reagime të forta. Ngjarjet e Rumanisë apo kudo që ndodhin tregojnë se regjimet çfarëdo forme të kenë meritojnë të rrëzohen dhe rruga e rrëzimit të tyre janë protestat”, tha ai. Ndërkohë, edhe deputeti i qarkut të Korçës, Ervin Salianji pohoi për gazetën se e mbështet plotësisht deklaratën e ish-kryeministrit për të nisur revoltat kundër qeverisë.
