Berisha ka dashur të më vrasë pa paralajmërim”- ka qenë kjo deklarata e fortë e analistit Frrok Çupi, i cili për “Repolitix” rrëfeu se bëhet fjalë për vitet 1997.
Duke e cilësuar veten si “viktima e Berishës që ka jetuar rastësisht”, Çupi flet edhe për një listë që ishte e përbërë nga rreth 20 emra që ishin gati për t’u ekzekutuar.
“Berishën e kam këshilluar miliona herë, jam armiku i tij i shpallur prej tij, jam viktima e tij që ka jetuar rastësisht, me të thënë të vërtetën se mund të isha tek ata ku i ka dërguar të tjerët, ka pasur tentativa shpesh herë për zhdukjen e time, në 1997 kam qenë numri një i regjistruar në listat e Shaban Memisë për t’u vrarë pa paralajmërim, ishin nja 20 veta në ë listë, dhe unë jetova në Vlorë”, tha Çupi në Report Tv.
Vlen të theksohet se, dikur Frrok Çupi ka pasur një raport shumë të ngushtë me Sali Berishën, të cilin e këshillonte shpesh; e një prej këtyre rasteve ai e ka sjellë në vëmendje edhe në ‘Repolitix’. Mes të tjerave, Çupi tregon se si ish-kryeministri nuk i kishte qejf kritikat.
“Unë vija nga një persekutim në Spaç, sa isha emëruar në ministrinë e Kulturës, kisha dy fëmijë të vegjël që jetonin shumë keq dhe në atë kohë kisha filluar që të merrja një rrogë që nga gushti i vitit 1990, rrugës më thotë “Lëre punën në ministri dhe kushtoji punën partisë” dhe unë i thashë “pse”. më tha “se fëmijët tu janë mësuar që të vuajnë, ja po vuajnë dhe pak, ndërsa fëmijët e mi nuk janë mësuar kurrë të vuajnë, ka dhe një arsye se unë nuk punoj dot me këta”.
S’ishte ende kryetar partie, me “këta” kuptonte “veriotët nuk janë mësuar të punojnë me jugorët”. I thashë “mua nuk ka rëndësi sa do vuajnë fëmijët e mi, problemi është që këtë ‘ne dhe ata’, mos e thuaj më’. Këshillat e mia kanë qenë në kohën kur i kam bërë kritika të ashpra, ai kurrë nuk dëgjuar, kritikat e detyrojnë atë që ta vrasë atë që bën kritikën”, tha Çupi.
