Albin Kurti, duke raportuar në Kuvend për situatën e fundit të shkaktuar në veri të vendit, pas rrëmbimit të tre policëve të Kosovës nga forcat serbe, brenda territorit të Kosovës, ka thënë se Kosova “nuk lejon të nënshtrohet nga milicia fashiste e Vuçiçit.
Teksa ka lavdëruar Policinë e Kosovës për “vetëpërmbajtje të theksuar” që nga nisja e tensioneve në veri në fund të majit, Kurti ka thënë se autoritetet e Kosovës në vazhdimësi janë përgjigjur me “kujdes maksimal”.
“Dy prej tyre kishin edhe probleme shëndetësore. Efektivët nuk kanë qenë pjesë e njësive elitë siç po përpiqet t’i paraqesë Serbia. Fakti që ndërkombëtarët po mobilizohen për lirimin e tyre, tregon se të gjithë e dinë që rrëmbimi është kryer në territorin tonë, ndryshe askush nuk do të fliste për lirimin e tyre. Ky është agresion ndaj republikës sonë dhe KFOR-it. Hakmarrjeve të tilla do i përgjigjemi me rend e ligj. Nuk ka as kthim pas e as nënshtrim”, tha ai.
Kryeministri tha se rrembimin e policëve e bënë dy formacione ushtarake serbe, përfshirë edhe njësitit “Cobra”.
“Njësitet policore ne i kemi vendosur në 16 rrugë në veri për të parandaluar kontrabandën. Policët e arrestuar ishin të specializuar për të parandaluar kontrabandën, por Serbia i dërgoi njësitet më elitare për arrestimin e policëve”, tha Albin Kurti.
