Rich Kinder dhe bashkëshortja e tij, Nancy Kinder, dy nga filantropët më të njohur në Hjuston të Teksasit, kanë njoftuar se do të dhurojnë 95% të pasurisë së tyre, që vlerësohet në rreth 11 miliardë dollarë, për bamirësi dhe projekte në komunitetin lokal.
Në një intervistë për ABC13, çifti tha se pjesa më e madhe e pasurisë do të shkojë për fondacione dhe organizata jofitimprurëse në Hjuston, ndërsa rreth 550 milionë dollarë do të mbeten për pasardhësit e tyre.
“Ne duam që nipërit dhe mbesat tona të jenë krenarë për ne, të dinë se presim që ata të vazhdojnë atë që filluam,” – u shpreh Nancy Kinder.
Rich Kinder është bashkëthemelues dhe kryetar ekzekutiv i Kinder Morgan, një prej kompanive më të mëdha të infrastrukturës energjetike në Amerikën e Veriut, me mbi 30,000 milje tubacionesh dhe një kapitalizim tregu prej rreth 66 miliardë dollarësh.
Ndërkohë, Nancy Kinder është presidente dhe drejtuese ekzekutive e Fondacionit Kinder, i cili që nga themelimi në vitin 1997 ka dhuruar më shumë se 700 milionë dollarë për projekte që lidhen me arsimin, planifikimin urban dhe përmirësimin e cilësisë së jetës në Hjuston.
Familja Kinder ka qenë pjesë e iniciativës The Giving Pledge, të krijuar nga Bill Gates, Melinda Gates dhe Warren Buffett, që inkurajon miliarderët të dhurojnë të paktën gjysmën e pasurisë së tyre për qëllime bamirësie.
Ky vendim e vendos çiftin Kinder mes filantropëve më të mëdhenj në SHBA, duke ndjekur shembullin e emrave si MacKenzie Scott, Warren Buffett dhe Bill & Melinda Gates.
Burimi: Fortune
