Gjatë seancës gjyqësore paraprake që zgjati rreth 11 orë, kryetari i Bashkisë së Tiranës, Erion Veliaj, u përball me prokurorët e çështjes, rreth mungesës së fakteve që e implikojnë atë si një të burgosur dhe momentit kur është bërë arrestimi.
Gjykata bëri fillimisht rreth gjysmë ore rezistencë që avokatët të njiheshin me aktet, deri kur kryeprokurori dha miratimin. Më pas, atyre iu la katër orë kohë për të shfletuar 65 fashikujt e dosjes.
Veliaj u shpreh se, duke e burgosur në mes të fushatës elektorale, prokurorët kanë bërë më shumë një akt politik sesa juridik.
“Pas 11 orë e ca seance, unë ende nuk e di pse jam arrestuar me burg, ende nuk e di pse jam këtu. Nuk ma kanë shpjeguar.”
Ai tha se një nga argumentet e SPAK për ta lidhur atë me një pasuri ishte se lodrat e djalit të tij ndodheshin në shtëpinë e gjyshes së fëmijës, duke e cilësuar këtë një absurditet:
“Më keni përmendur pse janë lodrat e djalit tim te shtëpia e gjyshes së vet… për të thënë që meqë janë lodrat e djalit aty, qenka shtëpia ime. Unë besoj që çdo gjyshe mban lodra të nipërve e mbesave në shtëpi.”
Veliaj tha se shifrat që SPAK ka publikuar në media janë të pavërteta dhe se ata kanë gërmuar në gjithë jetën e gruas së tij dhe të vetën, duke prodhuar tabela dhe shifra që nuk i përgjigjen realitetit:
“Familja e Ajolës është një familje e vjetër me emër në shoqëri, që ka pasur bizneset e saj që nga viti 1995 dhe nuk mund të abuzohet me të ardhurat e një familjeje dhe shpenzimet e saj, duke ia faturuar vajzës dhe dhëndrit.”
Më pas, ai iu drejtua prokurorëve me pyetjen:
“Ku qëndron rrezikshmëria ime që më mbani në burg? Ju po më bëni veting që nga viti 2004… Më tregoni ligjin që më ju lejon të bëni ndaj meje vetingut, më thoni që po më bëni veting, dhe të përgjigjem si për veting”
Duke folur për bashkëpunimin me SPAK, Veliaj tha se ai ka bashkëpunuar me SPAK dhe BKH deri në momentin e fundit: “Kam bashkëpunuar edhe kur erdhën të marrin shkresa në Bashki natën e Vitit të Ri. Por kur më prekni familjen, aty sigurisht që acarohem.”
Ai iu referua disa mesazheve të shkëmbyera me një prej agjentëve të BKH, i cili i kishte kërkuar me SMS që gruaja e tij të paraqitej në SPAK.
Në këtë moment, prokurori Olsi Dado, duke ngritur zërin, i bërtiti Veliajt:
“Je patologjik!”
Pas kësaj Veliaj tha se “ju e keni ndarë mendjen çfarë do bëni dhe e gjithë kjo seancë është formale. Fakti që gjyqtari po ju pytet në sytë tanë se ç’masë duhet të marrë, tregon qartë standartin e këtij gjykimi”.
