Ulja bashkë në tryezën e dialogut e Partisë Demokratike dhe Lëvizjes Socialiste për Integrim me Partinë Socialiste sa i takon reformës zgjedhore është parë me skepticizëm nga opozita parlamentare. Gjatë një prononcimi për gazetën “SOT”, deputeti i opozitës, njëherësh nënkryetari i grupit parlamentar “Demokrat”, Arlind Çaçani ka ironizuar takimin e së martës, ndërsa PD, LSI dhe PS i ka etiketuar si mazhorancë.
Megjithatë, në fjalën e tij, zoti Çaçani ka rrëzuar zërat se partitë e mëdha do bëjnë një reformë zgjedhore, duke anashkaluar opozitën, ndërsa ka vënë në dukje faktin se mazhoranca në Kuvend ka vetëm 78 vota, ndërkohë që kalimi i kësaj marrëveshje kërkon 84 vota. Sipas tij, opozita është në Parlament për të votuar reformat e mëdha dhe jo për të qenë fasadë e partive të mëdha. “Fakti që PD dhe LSI u ul në tryezën e dialogut me PS-në, tregon që ata të tre janë mazhoranca dhe ne opozita. Ne opozita kemi kushtet tona për të pranuar marrëveshjen që na është lënë për të firmosur futja për diskutim ndryshimi sistemit zgjedhore.
Fakti që i detyron ata të mos na anashkalojnë është vota jonë në Kuvend. PS-PD-LSI kanë 78 vota të gjithë bashkë. Nuk kanë 84. Mund t’i blejë dhe kjo ndodh. Po sytë e ndërkombëtarëve këtu janë? Ne do të japim kontributin tonë që të kemi një produkt sa më të mirë për Shqiptarët. Ne kërkojmë ndryshimin e sistemit, ku një model është ai që propozuam. Ne nuk jemi në Parlament për të qenë fasadë e partive të mëdha”, deklaroi Çaçani.
Ndërkohë, në të njëjtën linjë me kolegun e tij është rreshtuar edhe deputeti i opozitës, Arben Elezi. Ky i fundit gjatë një prononcimi për gazetën “SOT” shprehu bindjen se ulja në tryezë e PD, LSI dhe PS anashkaloi komisionin e reformës zgjedhore, ndërsa ironizoi takimin, duke theksuar se i kujton vitin 2017. Zoti Elezi theksoi se ai mbështet ndryshmin në tersi të sistemit zgjedhor dhe se vota e tij, do të shkojë vetëm nëse plotësohet kjo kërkesë. “Unë dhe kolegët e mi jemi pro ndryshimit të sistemit zgjedhor, konkretisht lista të hapura, rajonal me korrektim kombëtar. Kemi propozuar draftin përkatës. Por ka një problem, pasi ulja në tryezë e të “mëdhenjve” e zhbëri komisionin e reformës zgjedhore. Duhet futur në diskutim tek ajo platforma e djeshme propozimet e komisionit të reformës zgjedhore për vitin 2019, pasi ata kanë vendosur të punojnë me objektivat e vitit 2017. Unë nuk mbështes një produkt gjysmak që prek vetëm ndryshimet e Kodit Zgjedhor, por insistoj tek ndryshimi i reformës zgjedhore”, deklaroi Elezi.
