Ditët e fundit, nisma më e re e qeverisë për mbylljen e lokaleve të basteve është kthyer në një temë mjaft të nxehtë diskutimesh.
A është kjo një nismë e Edi Ramës për të favorizuar kompanitë që janë online, dhe a na çon kjo drejt monopolizimit të tregut?
Këto janë vetëm disa nga pyetjet që shtrohen, e megjithatë për deputetin socialist Erion Braçe kjo është një nga nismat më të rëndëishme të ndërmarra nga qeveria.
Ai ka treguar në një lidhje telefonike për In TV, se vetë atë e kanë kërcënuar çdo ditë biznesmenë të kësaj fushe.
Sipas Braçes, më shumë se 25 sms kërcënuese vijnë çdo ditë në celularin e tij, dhe e gjitha kjo që po ndodh është e neveritshme.
“Nuk ka ditë që nuk marr 20-25 mesazhe nga njerëz të kësaj industrie në këtë vend, janë kthyer në sms të neveritshme dhe që ushtrojnë presion mbi deputetin e Kuvendit me lloj -lloj formash.
Ata nuk mund të më presionojnë, pasi secili që ka shkruar, ka marrë përgjigje të qartë, pra mbyllja e të gjitha aktiviteteve të basteve sportive.
Mbyllja e aktiviteteve të basteve sportive, lojërave online, nëpër lagje etj, ajo që kam propozuar është se shteti që do vendosë si do organizojë këtë aktivitet në rast se do ekzistojnë.
Edhe kazinotë duhet t’i nënshtrohen një tatimi të ri.
Me ligj, kazinotë duhet të zhvendosen nga zonat e banuara, nuk jam dakord me tatimin që kanë.
Kam parë normat e fitimit të tyre dhe jam i llahtarisur, arrijnë deri në 49%.
Me këto norma duhet një tatim mbi fitimin e tyre dhe thuajse konfiskues”, u shpreh deputeti i PS.
Kujtojmë se dy ditë më parë Rama iu dërgonte një mesazh të gjithë deputetëve të tij që të mos shqetësoheshin nga këto mesazhe, pasi është normale që bizneset që do mbyllen të përdorin çdo mënyrë presioni që qeveria të tërhiqet.
