Djali i ish-presidentit të SHBA-së, Hunter Biden, tha të enjten se do të ishte i hapur për një “ndeshje në kafaz” me djemtë e presidentit Donald Trump.
Në një video të postuar në rrjetet sociale, Hunter Biden tha se themeluesi i Channel 5, Andrew Callaghan, po përpiqej të organizonte një përballje të mundshme në kafaz mes tij dhe djemve të Donald Trump, Eric Trump dhe Donald Trump Jr.
“Hej, djema. Këtu Hunter Biden. Sapo mora një telefonatë nga Andrew Callaghan. Ai më kërkoi të bashkohem në turin ‘Channel Five Carnival’ në fund të muajit. Mendoj se fillojmë në Phoenix, pastaj shkojmë në San Diego dhe e mbyllim në Albuquerque”, tha Hunter.
“Dhe mendoj se ai po përpiqet të organizojë një ndeshje në kafaz, unë kundër Eric Trump dhe Donald Trump Jr.. I thashë që jam dakord, 100% brenda, nëse arrin ta realizojë. Edhe nëse nuk arrin, prapë do shkoj. Dhe besoj se ka edhe shumë surpriza të tjera, shumë argëtim. Shpresoj t’ju shoh atje. Mund të blini bileta online që tani dhe do të shihemi gjatë turit”.
