Patrick Amoako Sefa, babai i futbollistit të ndjerë ganez Raphael Dwamena, i është lutur publikut ganez që të mbështesë familjen me lutje në këto kohë të vështira, si edhe ka kërkuar ndihmën e Federatës Ganeze të Futbollit t’i ndihmojë për kthimin e trupit të pajetë në vendlindje.
Në një intervistë për Peace FM në Ganë, Patrick Amoako Sefa zbuloi ndjenjën e pikëllimit të thellë që pushtoi familjen kur morën vesh lajmin për ndarjen nga jeta të djalit të tyre.
“Ne kemi qarë dhe vajtuar që kur kemi dëgjuar lajmin, por kemi besim te Zoti që të na mbajë të fortë,” tha ai. Patrick Amoako Sefa zbuloi gjithashtu planet e familjes për të transportuar trupin e futbollistit të ndjerë në Ganë. Ai i bëri thirrje Shoqatës së Futbollit të Ganës dhe qeverisë për mbështetje për të dërguar trupin në vendlindje.
“Kemi folur me gruan e tij dhe ajo tregoi se ata po merrnin masa për të siguruar një fluturim për ta sjellë trupin në Ganë. Ne kemi nevojë për ndihmë për ta sjellë trupin në atdhe. Ne po i bëjmë thirrje Federatës së Futbollit të Ganës dhe të gjithë personave që të na ndihmojnë ta sjellim trupin në Ganë”, tha ai. Ai e përfundoi intervistën me një apel për ganezët që “t’i kujtojnë në lutje”.
Sulmuesi 28-vjeçar ganez vdiq të shtunën, më 11 nëntor 2023, gjatë një ndeshje mes Egnatias së tij dhe Partizanit në stadiumin e Rrogozhinës. Raphael Dwamena, kishte një histori të dokumentuar të problemeve të zemrës, teksa u rrëzua në fushë pas arrestit kardiak dhe ndërroi jetë duke u transportuar në spitalin e Kavajës.
Historia tragjike e tij fillon që në vegjëli, kur u braktis nga prindërit dhe u rrit nga gjyshja. Megjithëse ka munguar për shumicën e jetës së ish-kapitenit të Egnatias, babai i tij është bërë i gjallë në momentin kur duhet të varrosë të birin që ishte vetëm 28 vjeç.
