Këngëtarja nigeriane Ifunanya Nwangene, e njohur për pjesëmarrjen e saj në sezonin e tretë të spektaklit “The Voice Nigeria”, ka ndërruar jetë në moshën 26-vjeçare, si pasojë të një pickimi fatal nga gjarpri.
Sipas raportimeve të BBC Africa, Nwangene u pickua nga një gjarpër helmues në banesën e saj në Abuja, ndërsa ishte në gjumë. Pickimi e zgjoi dhe ajo kërkoi menjëherë ndihmë mjekësore, fillimisht në një klinikë lokale, ku nuk kishte antidot të disponueshëm. Më pas u transportua në Qendrën Federale Mjekësore Jabi, ku fatkeqësisht ndërroi jetë.
Një anëtare e korit ku ajo bënte pjesë, Hillary Obinna, ka deklaruar se autoritetet gjetën dy gjarpërinj brenda banesës së saj pas ngjarjes.
Lajmi për ndarjen nga jeta u konfirmua nga drejtori muzikor i korit Amemuso, Sam Ezugwu, përmes një njoftimi në rrjetet sociale. “Me zemër të thyer njoftojmë ndarjen nga jeta të Ifunanya Nwangene Nanyah. Zëri dhe shpirti i saj do të na mungojnë thellësisht,” thuhej në deklaratë.
Ifunanya Nwangene ishte soprano, e lindur në Enugu dhe e diplomuar në arkitekturë. Ajo fitoi vëmendjen e publikut në prill të vitit 2021, pas interpretimit të baladës “Take a Bow” të Rihanna-s në “The Voice Nigeria”, duke u vlerësuar për vokalin dhe ndjeshmërinë artistike.
Në kanalin e saj në YouTube, ajo kishte publikuar interpretime të disa këngëve të njohura, përfshirë “Lift Me Up” (Rihanna), “My Heart Will Go On” (Celine Dion) dhe “Slide Away” (Miley Cyrus).
Ndarja e saj e parakohshme ka tronditur komunitetin artistik dhe ndjekësit e saj, të cilët e kujtojnë si një artiste të talentuar dhe një person me shpirt pozitiv.
Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
