Kryeministri Edi Rama është shprehur edhe një herë i bindur dje se zgjedhjet vendore do të mbahen në datën e caktuar nga Kushtetuta, në 30 qershor. Gjatë një takimi me banorët e Divjakës në kuadër të fushatës zgjedhore, shefi i qeverisë u shpreh se ç’dekreti i datës së zgjedhjeve erdhi nga frika që opozita dhe presidenti kanë nga reforma në drejtësi. Sipas tij, PD-LSI ka plan destruktive kundër Shqipërisë, pasi ata nuk duan çeljen e negociatave me BE.
“Do të kishim dëshiruar që këtë fushatë ta kishim garë me kundërshtarët tanë për të parë idetë dhe kandidatët më të mirë, por fatkeqësisht nuk ka ndodhur kështu, pasi kanë kapitulluar para se të fillojë ndeshja. Nuk përballen dot me ne në zgjedhje, kanë frikë nga gjykimi i njerëzve dhe të maten me ne duke bërë atë që politika duhet të bëjë dhe jo duke sharë dhe shpifur dhe kërcënuar.
Frika nga zgjedhjet dhe tmerri nga reforma në drejtësi dhe paniku ka bërë që të kthehen në një front kundër çeljes së negociatave. Nesër do të flasim më shumë, por akti i fundit i Metës e ka zbardhur plotësisht planin dhe na ka dhënë të kuptojmë se ku fle tamam lepuri. Sigurisht që ne kemi bërë shumë por në asnjë mënyrë sa do të donim”, tha Rama.
Opozita dhe presidenti duan kaos
Kreu i ekzekutivit nuk i kurseu akuzat dhe sulmet në drejtim të opozitës. Rama tha se Berisha, Basha, Kryemadhi dhe Meta janë ata që nxisin skenat e dhunës, pasi duan vetëm kaos. Sipas tij, kushdo që ndjek skenarët e tyre jo vetëm që do të dënohet me burg, por do u ndalohet edhe hyrja në vendet e BE dhe SHBA.
“Kjo aleanca atyre u duhet për të mbrojtur veten nga drejtësia për të krijuar kaos dhe kushtet që të ulemi me ata që të themi aman mos vrisni veten se do të bëjmë bashkë, të rishikojmë gjërat, por njerëzit që u shkojnë pas…demokratët janë në drejtën e tyre. Sa të jenë këta të katër (Berisha, Meta, Kryemadhi dhe Basha) nuk ka hajër PD-ja, se ajo tjetra për fat të keq.
Demokratët kanë gjithë të drejtën të mos na votojnë. Ata kanë të drejtë të mos më duan. Por duhet ta kuptojnë se udhëhiqen nga katërshe që nuk do integrimin e Shqipërisë. Nuk besoj se ekziston ndonjë demokrat apo person që të hyjë në burg për këta 4 vetë. E dinë shumë mirë se nëse pengojnë zgjedhjet, ata mirë që do të hyjnë në burg, por nuk do të shkojnë më as në Europë, as në SHBA”, deklaroi Rama.
Përsëritja e ’97-tës
Mes ironisë kryeministri Rama komentoi edhe argumentin e presidentit Meta, i cili tha se kishte informacion nga agjencitë ligjzbatuese për trazira. Kreu i qeverisë deklaroi se ata persona të cilët shkaktuan trazira në ’97 sot janë në dëshpërim, duke shtuar mes ironisë se këto argumenta presidenti i ka parë në llumin e filxhanit të fallxhores.
“Kam vendosur të bëj paqe dhe të mos flas për atë që e quaj kazan, ashtu ishte dhe do mbetet, çdo natë përpiqen të tmerrojnë njerëzit se do të ndodhë një ’97 e dytë, por pse do të ndodhë? Ata që e shkaktuan 1997 sot janë kaq të dëshpëruar dhe i gënjen mendja se mund të tundin fantazmën dhe të tmerrojnë dynjanë. Sa i takon shqetësimit të madhe të Metës do të përsërisja një këshillë që i dha Spiropali, ku i tha ke hall të shpëtosh Shqipërinë?
Bind Monikën që të mos hakërrehet dhe bind Saliun për Lulin. Janë katër veta, dy kryesorët, Ilir dhe Saliu, dhe ai tjetri dhe Monika fallxhorja me artistin dhe e gjitha kjo një llum në filxhanin e fallxhores. Kam informacion thotë Ilir nga agjencitë ligjzbatuese, dmth nga filxhani i Monikës, ku duket një 30 kokë poshtë. Këto janë agjencitë ligjzbatuese të Presidentit”, tha Rama.
Po ashtu, kreu i qeverisë reagoi edhe për shkarkimin e Metës, duke thënë se ka humbur të drejtën të qëndrojë në atë zyrë. “Ilir Meta ka kryer një akt të panjohur në historinë e qeverisjes së botës, firmos dhe ç’firmos, sikur bota të hynte në logjikën e Metës që firma e çdo autoriteti të ishte e mund
ur të zhbëhej nuk do të kishte më shtet dhe rregull, dhe drejtim, por do të bëhej mbarë bota një rrumpallë e madhe. Prandaj kjo do të mbetet vetëm një vepër e shëmtuar, pa përgjegjshmëri dhe që nuk mund as të pranohet dhe as të tolerohet. Meta e ka humbur të drejtën të qëndrojë në zyrën e Presidentit për sa kohë fuqia e popullit sovran është te parlamenti dhe që parlamenti ka jo vetëm të drejtën, por detyrën të reagojë në emër të sovranit nëse Presidenti çmendet”, tha Rama. /Rigels Seliman
