Kryeministri Edi Rama ka mbledhur sot në një takim ministrat dhe grupin parlamentar, një ditë pas vendimit të BE-së për çeljen e negociatave në qershor të vitit 2019.
Në fjalën e tij, Rama ka sulmuar ashpër opozitën, që sipas tij ka punuar kundër hapjes së negociatave.
Ai i ka quajtur deputetët e PD-së, stërnipër të Esat Pashë Toptanit.
“Teksa ne merrnim urimet nga të huajt, opozitat jonë sadiste hidhte në mexhilis gurët e tyre për të prishur shqiptarëve ditën e tyre.
‘U shty data, u shty data sepse Europa refuzoi narko qeverinë’.
Çfarë vulgariteti, çfarë ligësie.
Po si mund të shtyhet një datë që nuk është vënë?
Si mund të pranojë KE të vendosë një datë për çeljen e negociatave dhe të ndezë dritën jeshile për të nisur përgatitjet me një narko-qeveri?
Si mund të keqtrajtohen kaq brutalisht zgjedhësit e tu?
Këtë e bëjnë një grup njerëzish që janë pa fe dhe pa din e imam.
Na pyesnin çuditur që si ka mundësi që opozita juaj ta dojë me kaq pasion bllokimin e Shqipërisë dhe mos çeljen e negociatave? Si ka mundësi?
Lulzim Basha ka në fytyrë ka Babale Velin, në shpirt ka Sali efendiun.
Opozita është mallkim që na ka ndjekur hap pas hapi.
Opozita gënjen kur thotë se u shtynë negociatat.
Morëm dritë jeshile për hapjen e negociatave,” u shpreh Rama.
