Nata e dytë e Festivalit të Sanremos nuk ka dhuruar vetëm spektakël e muzikë, por edhe një nga momentet më njerëzore dhe prekëse të këtij edicioni, i cili po transmetohet drejtpërdrejt dhe ekskluzivisht për publikun shqiptar në kanalin RTSH 2. Prezantuesi Gianluca Gazzoli ka përlotur publikun e Teatrit Ariston me një dedikim thellësisht personal, duke zbuluar një koincidencë rrëqethëse: debutimi i tij në këtë festival historik ndodhi pikërisht sot, më 25 shkurt, në ditën e lindjes së nënës së tij që u nda nga jeta pak muaj më parë.
Gazzoli, i cili i është bashkuar dyshes Carlo Conti dhe Laura Pausini për të drejtuar gjysmëfinalet e kategorisë “Nuove Proposte” (Të Rinjtë), e nisi ndërhyrjen e tij me fjalë vlerësimi për drejtorin artistik. Ai e cilësoi Contin si një “mësues të shkëlqyer dhe bujar”, duke theksuar se bujaria është një cilësi për të cilën bota e televizionit ka shumë nevojë në ditët e sotme.
Një ëndërr e realizuar dhe një mungesë e madhe
Më pas, vëmendja e moderatorit u kthye nga familja e tij e pranishme në audiencë dhe nga humbja e rëndë që ka përjetuar së fundmi. Me zërin e tradhtuar nga emocionet, Gazzoli ndau me miliona shikues dhimbjen e pamundësisë për të ndarë këtë arritje me njeriun e tij më të shtrenjtë.
“E dini çfarë do të thotë të të mohohet mundësia për t’i treguar një të dashuri diçka të bukur që në momentin e parë,” u shpreh ai nga skena e Aristonit. “Dhe këtë vit e gjej veten duke përmbushur ëndrrën time të jetës, duke qëndruar në këtë skenë, më 25 shkurt, ditëlindjen e nënës sime.”
Mes duartrokitjeve të ngrohta të sallës, Gazzoli e përmbylli monologun e tij me një mesazh shprese për të gjithë ata që ndjekin ëndrrat e tyre, duke theksuar se asgjë nuk ndodh rastësisht.
“Jeta shpesh na dërgon sinjale, dhe ne duhet të ndalemi herë pas here për t’i pranuar ato. Ndonjëherë ëndrrat bëhen realitet,” përfundoi ai.
Ky moment solli një pauzë reflektimi në mes të garës së ethshme muzikore, duke i kujtuar publikut dimensionin njerëzor që fshihet pas dritave të skenës më të rëndësishme në Itali.
