Makthi i McLaren është bërë realitet. Lando Norris dhe Oscar Piastri janë skualifikuar nga Çmimi i Madh i Las Vegasit për shkak të konsumimit të tepërt të dyshemeve të makinave të tyre. Dërrasa e dyshemesë, ose rrëshqitësja, është një dërrasë druri e pozicionuar në dyshemenë e sheshtë të makinës, roli kryesor i së cilës është të mbajë një distancë minimale nga toka për arsye sigurie.
Kjo dërrasë është 10 milimetra e trashë dhe sipas rregullores, nuk mund të konsumohet më shumë se një milimetër (pra nuk mund të jetë më pak se 9 mm). Ajo që supozohej të ishte një ditë pozitive për Norrisin, i cili, falë vendit të dytë të arritur në garën e fundit të Las Vegasit, kishte fituar një shans vërtet të artë për të fituar Kampionatin Botëror në garën e ardhshme në Katar, u shndërrua në një katastrofë për pilotin anglez.
Në të vërtetë, hija e Max Verstappen, fituesit të sotëm në Las Vegas, është bërë shumë më e dukshme me dy Çmime të Mëdha dhe një garë Sprint të mbetur për këtë sezon.
LEXO EDHE:
Çfarë duan SHBA-të? 5 çështjet kryesore për marrëveshjen për Ukrainën: Nga kufijtë te siguria
Me rezultatet e sotme, Norris mbetet në krye me 390 pikë, 24 më shumë se shoku i skuadrës Oscar Piastri dhe piloti i Red Bull, Max Verstappen. Garat e ardhshme në Katar dhe Abu Dabi do jenë më shumë se finale për pilotët, me titullin kampion që mund të vendoset me ‘fotofinish’.
Pas skualifikimeve të dy makinave McLaren, Max Vertappen mbetet fitues i garës së Las Vegas, ndërsa në podium ngjitet George Russell si vendi i dytë dhe Andrea Kimi Antonelli si vendi i tretë.
Rezultatet e përgjithshme pas garës së sotme dhe vendimit të FIA:
Lando Norris – 390 pikë
Oscar Piastri – 366 pikë
Max Verstappen – 366 pikë
Ja sesi do dukej renditja e pilotëve bazuar në rezultatet origjinale të sotme, pa skualifikime:
Lando Norris – 408 pikë
Oscar Piastri – 378 pikë
Max Verstappen – 366 pikë
