Sipas një analize të Simon Kuper publikuar në Financial Times, Donald Trump po luan sot një rol paradoksal në Europë: atë të armikut të përbashkët që po i jep kontinentit një ndjenjë uniteti që i ka munguar për dekada. Një ide e vjetër në politikë thotë se për të ndërtuar një identitet kolektiv nevojitet një kundërshtar dhe Europa, për një kohë të gjatë, ka vuajtur pikërisht nga mungesa e tij.
Për dhjetëra vite me rradhë, Bashkimi Europian ka qenë një projekt kryesisht teknik dhe ekonomik, pa emocione të forta publike. Ai u ndërtua lehtësisht, por pa entuziazëm masiv. Flamuri europian nuk frymëzonte ndjenjë sakrifice apo përkatësie. Kjo situatë nisi të ndryshojë fillimisht me Brexit-in, i cili u pa si kërcënim real për ekzistencën e BE-së dhe paradoksalisht rriti mbështetjen për Bllokun.
Më pas erdhi Vladimir Putin, i cili, përmes luftës në Ukrainë, forcoi ndjeshëm ndjenjën e unitetit europian. Por, sipas Kuper, Donald Trump është “armiku më i mirë deri tani”. Ai mishëron gjithçka që Europa pretendon se nuk është: përçmim për demokracinë liberale, kërcënim për paqen dhe shpërfillje për aleancat tradicionale.
Ndryshe nga kundërshtarët e mëparshëm, Trump vjen nga brenda kampit që Europa e ka parë për dekada si mbrojtësin e saj kryesor. Pikërisht kjo e bën ndarjen më të dhimbshme, por edhe më mobilizuese. Sipas analizës, europianët sot ndihen më europianë se kurrë më parë.
Elitat politike flasin hapur për një Europë që duhet të mbrohet pa SHBA-në, ndërsa opinioni publik po ndryshon me shpejtësi. Sondazhet tregojnë se shumica e europianëve e shohin Trump si armik dhe jo si aleat, ndërsa mbështetja për një rol më aktiv ushtarak të BE-së është rritur ndjeshëm.
Kuper vëren se kjo ndjenjë nuk është më vetëm elitare. Ajo është përhapur te qytetarët e zakonshëm dhe po krijon një emocion kolektiv që Europa nuk e ka pasur më parë. Trump, pa e synuar, po e shtyn BE-në drejt një faze të re: nga një treg i përbashkët i papërfunduar, drejt një identiteti politik dhe emocional më të fortë.
Në fund, analiza arrin në përfundimin se nëse Europa po çlirohet nga varësia e saj historike ndaj Amerikës, ky proces është njëkohësisht frikësues dhe çlirimtar – dhe Donald Trump është figura qendrore që po e përshpejton këtë ndryshim./ Financial Times
