Komisioni i Rithemelimit të Partisë Demokratike do të mbledhë ditën e sotme në orën 18:00 Këshillin Kombëtar të partisë për të caktuar qëndrimin përfundimtar për çështjen e zgjedhjes së presidentit të ri, por dhe për dy aspekte të tjera. Lajmi u dha deputeti dhe anëtari i Grupit të Rithemelimit të PD, Edi Paloka në një dalje për mediat.
Ai theksoi se do të konstituohen 150 anëtarët e rinj të këtij këshilli që u zgjodhën në Kuvendin e 30 prillit. “Komisioni i Përkohshëm i Rithemelimit, ushtrues i kompetencave te Kryesisë së PDSH dhe Kryetarit ka vendosur thirrjen e mbledhjes së parë të Këshillit Kombëtar në datën 6 Maj ora 18.00 ne Selinë e PDSH.
Qëllimi i mbledhjes, përveç konstituimit të K.Kombëtar është përcaktimi i një qëndrimi politik të PDSH lidhur me procesin e zgjedhjes së Presidentit të Republikës”, deklaroi ish-kryetari i Këshillit Kombëtar të partisë më të madhe opozitare. Në këtë mënyrë, “Foltorja” sfidon sërish kreun e komanduar të PD, Enkelejd Alibeajn, i cili është përfshirë në negociatat me mazhorancën socialiste për zgjedhjen e një presidenti konsensual.
Për këtë çështje, Alibeaj mblodhi dje grupin e deputetëve demokratë, por për Grupin e Rithemelimit të PD, qëndrimin përfundimtar për çështjen e zgjedhjes së drejtuesit të ri të shtetit shqiptar e përcakton Këshilli Kombëtar i partisë, dhe jo kryetari i saj me deputetët. “Këshilli Kombëtar i PDSH është i vetmi organ i cili mund të përcaktojë qëndrimin e unifikuar të PDSH lidhur me një çështje të rëndësishme politike, si ajo e zgjedhjes së Presidentit të Republikës, pasi në bazë të statutit ai është organi më i lartë që drejton veprimtarinë politike të PDSH në periudhën midis dy Kuvendeve”, lexoi më tej Paloka.
Ish-kryeministri Sali Berisha kundërshton përfshirjen e PD në negociatat me PS për zgjedhjen e një presidenti konsensual, pasi sipas tij, kryeministri Edi Rama dhe socialistët po bëjnë një proces mafioz dhe jotransparent me caktimin e kandidaturave me zarfe. Berisha është përplasur ashpër me Alibeajn në mbledhjet e grupit parlamentar të PD dhe ka kërkuar që demokratët të mos përfshihen në këtë proces.
Këshilli Kombëtar i PD do zgjedhë drejtuesin e ri, Topalli dhe Paloka si kandidatura jozyrtare
Këshilli i sapozgjedhur i PD do të zgjedhë nesër drejtuesin e tij. Deputeti Paloka deklaroi se duhen minimalisht dy kandidatura për të garuar për këtë funksion në partinë më të madhe opozitare. “Bazuar në nenin 44 pika 4 e Statutit, në mbledhjen e parë të konstituimit të Këshillit Kombëtar, zgjidhet edhe kryetari i Këshillit Kombëtar midis të paktën 2 kandidaturave alternative”, përfundoi Edi Paloka.
Vetë ky i fundit dhe ish-kryeparlamentarja demokrate në vitet 2005-2013, Jozefina Topalli përfliten si kandidaturat jo zyrtare për funksionin e kryetarit të Këshillit Kombëtar të PD. Por, vetë Topalli konfirmoi ditët e fundit se nuk synon më asnjë post politik dhe partiak.
Deputeti demokrat dhe anëtari i “Foltores”, Luçiano Boçi është përfolur si kandidat për të drejtuar grupin e deputetëve të PD, por deri tani ende nuk kanë dalë kandidaturat zyrtare për funksionet drejtuese në selinë blu. Këshilli Kombëtar i PD do të zgjedhë më tej sekretariatin e partisë, kreun e grupit parlamentar, nënkryetarët e partisë dhe në 22 maj do të votojë për liderin e ri të demokratëve.
Në këtë mënyrë, n/kryetarja Jorida Tabaku, kreu i komanduar i PD dhe i grupit parlamentar demokrat, Enkelejd Alibeaj, Sekretari i Përgjithshëm, Gazment Bardhi së bashku me grupin e sekretarëve të tjerë të selisë blu nuk njihen më në këto funksione nga “Foltorja”. Tashmë, Partia Demokratike po shkon drejt ndarjes përfundimtare pasi po krijohen struktura paralele mes dy kampeve pro dhe anti-Sali Berishës. Ky i fundit ka konfirmuar se do të kandidojë për të fituar postin e kryetarit të PD dhe shikohet tashmë si lideri “de facto” i PD.
Publikohet lista me 274 anëtarë e Këshillit Kombëtar të PD, Berisha përfshin Alibeajn, Bashën, Bardhin dhe të gjithë deputetët kundërshtarë
Grupi i Rithemelimit të Partisë Demokratike publikoi listën e plotë me 274 anëtarët e Këshillit të Ri Kombëtar të Partisë. Lista u publikua nga deputetja demokrate dhe Kryetarja e Komisionit të Operacioneve Elektorale, Albana Vokshi. Ky Këshill Kombëtar është ndërtuar sipas statutit me këtë ndarje:
150 anëtarë të zgjedhur me votë në Kuvendin e 30 prillit, 52 deputetë të PD, 68 kryetarë të degëve të zgjedhur me votë (dy njësi ende nuk kanë zgjedhur kryetarin në Malësinë e Madhe dhe njësinë nr.12 në Tiranë), 1 kryetar bashkie (Bardh Spahia, i zgjedhur në 6 mars në Shkodër), Eduard Selami (si ish-kryetar i PD), Bujar Nishani (si ish-president i Republikës) dhe Jozefina Topalli (si ish-kryetare parlamenti).
Interesant është fakti se pavarësisht përçarjes dhe refuzimit të njohjes së palëve, ish-kryeministri Sali Berisha dhe “Foltorja” kanë vendosur të përfshijnë në Këshill Kombëtar dhe palën kundërshtare në PD: Enkelejd Alibeajn, Gazment Bardhin, Lulzim Bashën, etj., si pjesë e grupit të deputetëve, pa njohur funksionet që mbajnë aktualisht në parti.
Edhe pse ish-presidenti i Republikës, Bujar Nishani po kalon një periudhë jo të mirë shëndetësore, ai është përfshirë automatikisht në Këshillin Kombëtar të PD, ndërsa Topalli u rikthye pas 5 vitesh në PD me ftesë të Berishës. E gjithë anëtarësia do të konsitutohet nesër në mbledhjen e thirrur nga “Foltorja” në orën 18:00.
