Ishte 4 janari i vitit 1991, kur në Kinoteatrin e Qytetit Studenti, Partia Demokratike, e themeluar vetëm pak ditë më parë, po mbante një miting.
Lideri i ardhshëm i PD-së, Sali Berisha ishte njëri prej folësve në atë miting, por pranë mikrofonit u afrua edhe Edi Rama.
Fotografi Ali Begeja, i cili ndodhej aty pranë gjatë momentit të mbajtjes së mitingut i fotografoi të dy teksa flisnin.
“PD bënte mitingje në gjithë Tiranën, me intelektualë, para stadiumit. Aty ishte edhe Rama me intelektualët. Rama iu bashkua Berishës? Ne u habitëm, fliste me shumë mllef. Thonim: Mos vjen ndonjë ose ta vrasë, ose ta arrestonte. Dukej në foto që Rama kishte përgatitur diçka dhe e lexoi”, kujton fotografi Begeja në intervistën e tij për gazetaren e Top Channel Kristi Gongon në ‘Exclusive’.
Historike është gjithashtu edhe fotografia e Berishës duke folur në një nga qendrat e punës në Tiranë dhe në sfond ishte vendosur fotografia e Enver Hoxhës.
Fotografi Begeja e kujton kështu atë foto: “Berisha shkonte nëpër qendra pune dhe u bënte thirrje punëtorëve që t’a hiqnin vetë fotografinë e Enverit dhe prandaj është ajo foto”, tregon ai.
