Përmes një postimi të gjatë në rrjetet sociale, Donald Trump ka risjellë në vëmendje dëshirën e tij personale që Kanadaja të bëhet shteti i 51-të i Shteteve të Bashkuara të Amerikës.
Që pas nisjes së mandatit të dytë presidencial, ai e ka përsëritur shpesh idenë që vendi fqinj të bashkohet me 50 shtetet ekzistuese të unionit amerikan.
“Ne po i japim Kanadasë mbi 200 miliardë dollarë në vit. Pse??? Kjo nuk mund të vazhdojë më. E vetmja zgjidhje logjike është që Kanadaja të bëhet shteti ynë i dashur i pesëdhjetë e një”, shkroi Trump në platformën Truth Social.
Sipas tij, një bashkim i tillë do të eliminonte tarifat, do të rriste sigurinë për qytetarët kanadezë dhe do të ulte barrën fiskale. Ai shton se kjo lëvizje do ta kthente Amerikën në një vend edhe më të madh, më të mirë dhe më të fuqishëm, duke e konsideruar kufirin mes dy vendeve si një “vijë artificiale” që duhet të zhduket, shkruan Reuters.
Megjithatë, propozimi i tij është hasur vazhdimisht në refuzimin e kanadezëve, të cilët nuk kanë treguar gatishmëri për një bashkim të tillë me SHBA-në.
