Parlamentit i është bërë gati një dokument i cili do të përbëjë zhurmën më të madhe të sesionit të ri. Socialisitët duan të ndryshojnë ligjin e dekriminalizimit, me qëllim që personat që kanë qenë bashkëpunëtorë ose të favorizuar të ish-Sigurimit të Shtetit, të mos futen më në Parlament.
Më i rrezikuar është Ilir Meta pasi ky i fundit pak kohë më parë u fol se ka qenë spiun i ish-sigurimit të shtetit. Nisma vjen së fundmi pasi Autoriteti për Informimin mbi Dokumentet e ish-Sigurimit të Shtetit, i shkroi parlamentit se kishte zbuluar që ish presidenti Ilir Meta kishte qenë bashkëpunëtor i sigurimit.
Ndryshimi ligjor i hartuar në selinë rozë, thotë se nuk mund të kandidojnë dhe as të zgjidhen deputetë në Kuvendin e Shqipërisë, kryetar bashkie apo këshilltar në këshillin bashkiak, dhe në çdo rast nuk mund të marrin një funksion me votim nga Kuvendi personat të cilët provohen nga Autoriteti për Informimin mbi Dokumentet e ish-Sigurimit të Shtetit.
“Nuk mund të kandidojnë dhe as të zgjidhen deputetë në Kuvendin e Shqipërisë, kryetar bashkie apo këshilltar në këshillin bashkiak, dhe në çdo rast nuk mund të marrin një funksion me votim nga Kuvendi, përfshirë funksionin e Kryeministrit apo anëtarit të Këshillit të Ministrave, apo me votim nga këshillat bashkiakë ose të qarkut, personat të cilët provohen nga Autoriteti për Informimin mbi Dokumentet e ish-Sigurimit të Shtetit, se kanë qenë bashkëpunëtorë ose të favorizuar të ish-Sigurimit të Shtetit”, thuhet në draftin e PS.
Nëse një ligj i tillë miratohet, atëherë hartuesit e mazhorancës kanë parashikuar heqjen e menjëhershme të mandatit atyre deputetëve që mund të dalin me probleme me dosjet.
“Personave që janë duke ushtruar funksione të larta publike që provohen nga Autoriteti për Informimin mbi Dokumentet e ish-Sigurimit të Shtetit se kanë qenë bashkëpunëtorë ose të favorizuar të ish-Sigurimit të Shtetit u ndërpritet mandati dhe shkarkohen nga detyra për këtë shkak ligjor”, thuhet në draftin e PS.
Ndalimi i kandidimit për ata që kanë kryer një krim
Ndërkohë, në draft thuhet se ndalohet kandidimi ose zgjedhja në poste publike edhe në rastet kur një person ka kryer një krim ose është dëbuar nga një shtet anëtar i BE. Miratimi i një ligji të tillë, kërkon 84 vota, të cilat PS nuk i ka e vetme, por që shpreson t’i gjejë tek grupi i deputetëve demokratë që mbështesin Bashën. Ndërkohë vihet se, se nuk është ndryshuar ai nen i ligjit të dekriminalizimit që mund të largonte nga parlamenti Berishën. Pikërisht aty ku mund të konsiderohej pengesë edhe shpallja non grata, siç konsiderohet aktualisht dëbimi nga një shtet i huaj.
“Nuk mund të kandidojnë dhe as të zgjidhen deputetë në Kuvendin e Shqipërisë, kryetar bashkie apo këshilltar në këshillin bashkiak, dhe në çdo rast nuk mund të marrin një funksion me votim nga Kuvendi, përfshirë funksionin e Kryeministrit apo anëtarit të Këshillit të Ministrave, apo me votim nga këshillat bashkiakë ose të qarkut, personat të cilët janë dënuar me burgim me vendim të formës së prerë, brenda apo jashtë territorit të Republikës së Shqipërisë, për:
kryerjen e një krimi, që nuk përfshihet në shkronjat “a” dhe “b”, të kësaj pike, për të cilin janë dënuar me jo më pak se 2 vjet burgim; a) që janë dënuar me një vendim jopërfundimtar nga një autoritet gjyqësor i një shteti anëtar të BE-së, SHBA-së, Kanadasë, Australisë, apo për të cilët është vendosur masë sigurimi personal dhe/ose është lëshuar një urdhër kërkimi ndërkombëtar nga autoritetet e një prej këtyre shteteve, për kryerjen apo tentativën e kryerjes së një prej veprave penale, të parashikuara në pikën 1, shkronja “a”, të këtij neni.
Për personat që plotësojnë kushtet e këtij paragrafi, ndalimet zbatohen në përputhje me pikën 5, të nenit 10, dhe pikën 1, të nenit 16, të këtij ligji; b) që janë dëbuar nga territori i një shteti anëtar të BE-së, SHBA-së, Kanadasë, Australisë, në lidhje me një prej rasteve të parashikuara në pikën 1, shkronjat “a”, “b” dhe “c”, të këtij neni, apo janë dëbuar për cenim shumë të rëndë dhe serioz të sigurisë publike të shtetit përkatës”, thuhet në draftin e PS. /SHKRUAR NGA SIDORELA BRAÇJA
