Nga Ylli Manjani
Gjykata e Lartë është bërë objekt i debatit publik jo për vendimet e saj, që duhet të disiplinojnë praktikën gjyqsore, por për një votim ndërmjet dy kandidatëve për gjykatës Kushtetues.
Dy gjëra më bëjnë përshtypje:
E para që trupa gjyqsore e Gjykatës së Lartë ka preferuar në shumicë dërrmuese më mirë të zgjedhë zonjën Llagami, pra dikë nga jashtë radhëve të saj, sesa një kolegun e tyre.
Padyshim që bën përshtypje kjo gjë, por në fund të fundit nuk është edhe krejt jonormale. Ndoshta kolegët kanë preferuar në shumicë që të mbajnë aty kolegun e tyre.
E dyta është debati mbi një fletë votimi, ku tek emri i zonjës Llagami u gjetën dy shenja.
Gjëja e parë që të vjen në mend në kësi rastesh është praktika e ligjit të zgjedhjeve, ku një fletë e tillë do ishte padyshim e vlefshme.
Mirëpo krahasimi me ligjin e zgjedhjeve në këtë rast nuk është i duhuri sepse:
1. Ligji i zgjedhjeve duhet të menaxhojë vullnetin e shprehur të afërsisht 1.6 milonë njerëve. Jo të gjithë janë të vemendshëm e jo të gjithë janë njerëz me shkollë që të kuptojë rëndësinë e shënimit në fletëvotimi.
Ndaj dhe ai ligj toleron votuesin e thjeshtë, i cili është edhe i mbarsur me emocion politik. Por kjo tolerancë e ligjit për zgjedhjet nuk mund të vlejë për gjykatësit e lartë të këtij vendi që janë të shkolluar. Me përvojë, me njohuri ligjore të nivelit të lartë dhe të pakët në numër.
2. Numri i pakët i gjykatësve që votojnë është i rëndësishëm në këtë rast sepse, shenja ekstra në fletën e votimit e bën votën të identifikueshme shumë më kollaj sesa në radhët e 1.6 milionë votave.
Ajo votë me shenjë ekstra gjendet fare kollaj se e kujt është. Atëherë pyetja që lind është çfarë nevoje kishte votuesi-gjykatës të identifikonte votën?!
Se mos larg qoftë jemi përpara ndonjë ndikimi të paligjshëm apo larjes së ndonjë detyrimi privat?
Shumë ndjesë për insinuimin, por dyshimi është aty.
Ndaj mendoj se rrëzimi i asaj vote me dy shenja ishte vendimi i duhur nga ana e komisionit të votimit. Rezultati zyrtar është i duhuri dhe nuk mendoj se meriton më shumë debat.
Besoj se edhe Gjykata Administrative ka bërë gjënë e duhur që nuk e ka pezulluar atë vendimmarrje të komisionit të votimit.
Në fund të fundit rregulli i votimit thotë shënim në kutinë përkatëse, jo shënja ku të të dojë qejfi.
Kaq.
Ska përse të bëhet gjithë kjo gurgule mendoj.
