Adriana Kalaja, që mban edhe postin e ‘gjykatëses’ në PD, nëpërmjet një postimi, ka sulmuar sërish deputeten demokrate Jorida Tabaku, duke e akuzuar se ka zgjedhur të heshtë për fenomenin e pastrimit të parave të drogës në sektorin e ndërtimit dhe turizmit bregdetar.
Kalaja, e cila prej kohësh e etiketon Tabakun me epitetin “Sude e PD-së”, shkruan në postimin e saj:
“Pse Sudet e ekonomisë heshtin për pastrimin e parave të drogës në ndërtim dhe resorte në bregdet? Lidhja e Ramës me kartelet e drogës që kanë mbushur Evropën me kokainë dhe që pastrojnë paratë në ndërtim në Tiranë ka alarmuar DASH, që thirrën Dumanin për t’i kërkuar llogari, por kurrë këto 12 vite nuk kam dëgjuar të flasin për fenomenin Sudet e Ekonomisë.”
Ajo akuzon edhe ekonomistët shqiptarë, përfshirë ata që japin mësim në fakultete, se flasin për “çmimin e fryrë të mandarinave” ndërsa injorojnë rritjen e çmimeve të apartamenteve, të cilat sipas saj lidhen me pastrimin e parave në ndërtim.
“Ekonomistët e vërtetë e dinë rrezikun që i kanoset një ekonomie kur është në mëshirë të parave të narkotrafikut. Tirana dhe bregdeti janë kthyer në lavatriçen më të madhe në Evropë të pastrimit të parave, ndërsa Banka e Shqipërisë hesht e krenohet me euron e gjunjëzuar”, vijon Kalaja.
