Fakti që tre dosjet e rënda në ngarkim të Bashës, Berisha-Metës dhe sërish atë të Haxhisë që ka lëshuar akuza të rënda ndaj ish kryeministrit demokrat për vrasjen e Azem Hajdarit, janë në dorën e një gjyqtari të vetëm, Lazër Sollakut është një rastësi e frikshme. Ai ka ndjekur të njejtën rrugë për të tre rastet: Mbrojti të akuzuarit, duke i çuar drejt pafajsisë
Është shumë e habitshme se si disa gjyqtarë apo prokurorë kanë fatin e keq apo të mirë që gjithnjë “goglat” u japin për gjykim persona të caktuar apo të dëshiruar.
Madje ndodh që një gjyqtar të grumbullojë në dorën e tij për gjykim, nënvizojmë përmes shortit me sistem “goglash”, dosjet e gjithë kryesisë së një partie politike. Janë të gjitha dosje të rënda.
Ky “fat” i keq i ka ndodhur dhe gjyqtarit Lazër Sollaku, i cili kishte tashmë së fundmi në dorë dosjen përvëluese të Lulzim Bashës, ku duhej të vendoste, nëse duhej përfshirë akuza për lobim rus në SHBA, për të cilin FBI ka sjellë një mal me fakte dhe prova, apo duhej ta rrëzonte.
Dhe gjyqtari Lazër Sollaku vendosi të bëhej “sovranist” këtë radhë, duke marrë parasysh vetëm provat “bio” shqiptare, dhe duke e rrëzuar akuzën për 650 mijë dollarët rusë që iu dhanë Bashës përmes “Biniatta Trade” dhe realizoi “faljen” e kreut demokrat.
Tani, e urdhëroi ligji Lazër Sollakun, i bëri presion Edi Rama në favor të mikut të tij Basha, apo ndodhi ndonjë ndryshim në llogarinë e tij bankare, këtë ne nuk e dimë. T’ia gjejë anën drejtësia.
Ajo që dimë është se 650 mijë dollarët e dhënë për Bashën nga kompania guackë skoceze përmes Nick Muzin që po “shtrydhet” nga FBI, ftuan dhe prokurorinë shqiptare ta bënte një gjë të tillë por përtoi, kanë mbetur si “kopil” në derë të drejtësisë, dhe nuk dinë kujt t’ia “faturojnë”. Megjithëse dikush i ka marrë këto para dhe ka lobuar fort për foton e Bashës me Trump.
Por ky gjyqtar nuk e ka për herë të parë gjykimin dhe “konservimin” e dosjeve të mëdha. Lazër Sollaku është pjesë e hetimit të aferës “CEZ-DIA”, dhe është njeriu që për dy vite me radhë mban në sirtar një hetim të realizuar nga Parlamenti i Shqipërisë përmes komisionit parlamentar të hetimit të drejtuar nga Taulant Balla.
Për më tepër që kjo dosje hetimi e formatuar nga ana e Kuvendit ka për herë të parë dhe dëshminë e ish kryeministrit Sali Berisha për aferën e “CEZ-DIA”, i cili më pas ka refuzuar të shkojë para drejtësisë për të dëshmuar. Ka dëshmuar dhe Shkelzen Berisha, Nuel Kalaj refuzoi.
Një koncidencë e rastit ndoshta që po këtë dosje e ka gjyqtari që mori në dorë dosjen e lobimit rus të Bashës.
Me sa duket të njejtin fat do të ketë dhe afera CEZ-DIA, nëse nuk ndërhyn SPAK dhe Gjykata e Posaçme për ta hetuar, për t’ju rikthyer shqiptarëve mbi 500 milionë euro të abuzuara nga Berisha dhe Meta me familjet e miqtë e tyre, dhe për t’i çuar këta maskarenj para drejtësisë.
Ndërkohë që koncidencë nuk është fakti se po gjyqtari Lazër Sollaku kishte në dorë rigjykimin e Izet Haxhisë, ish truprojës së Sali Berishës, i cili u rikthye nga azili politik në Turqi për të gjetur drejtësi dhe hequr nga kurrizi akuzën për vrasjen e Azem Hajdarit.
Pasi këtë çështje e kanë zvarritur për muaj të tërë, pasi nuk u la presion pa ushtruar në drejtim të Izet Haxhisë, u gjet një zgjidhje për ta vonuar gjithnjë e më tepëper: Gjykata shpalli moskompetencën, duke e kaluar tek Krimet e Rënda.
Pasi qëndroi të Krimet e Rënda deri në ngritjen e SPAK, çështja kaloi në dorë të institucionit më të lartë të drejtësisë së re që do hetojë “peshqit e mëdhenj”, dhe po pret radhën për t’u shqyrtuar. Megjithëse kanë kaluar gati dy vite nga rikthimi i Izet Haxhisë.
Fakti që tre dosjet e rënda në ngarkim të Bashës, Berisha-Metës dhe sërish atë të Haxhisë që ka lëshuar akuza të rënda ndaj ish kryeministrit demokrat për vrasjen e Azem Hajdarit, janë në dorën e një gjyqtari të vetëm, Lazër Sollakut është një rastësi e frikshme. Për më tepër që ai ka ndjekur të njejtën rrugë në të tre rastet: Ka mbrojtur Bashën, Berishën e Metën./Pamfleti
