Ndikimi ekonomik i luftës në Ukrainë vërtet është i ashpër për aleatët e saj ka pranuar zonja e parë e Ukrainës, por ajo thekson se ndërsa britanikët “numërojnë qindarkat“, ukrainasit po “numërojnë viktimat”.
Sipas BBC-së, Olena Zelenska tha në një intervistë të regjistruar në Kiev, se nëse mbështetja për Ukrainën do të ishte e fortë, kriza do të ishte më e shkurtër.
Ajo tha se rrallë e shihte burrin e saj, por ata flasin çdo ditë.
Zonja e parë, e cila është e martuar me presidentin ukrainas Volodymyr Zelensky që nga viti 2003, foli me gazetaren e BBC-së Laura Kuenssberg në Pallatin Presidencial në Kiev të enjten.
Në intervistën që do të transmetohet të dielën më 4 shtator, zonja Zelenska u pyet se çfarë mesazhi kishte për britanikët që po përballen me rritjen e faturave të energjisë pjesërisht për shkak të pushtimit rus të Ukrainës dhe ndikimit që ka pasur në çmimin e gazit dhe naftës.
“Unë e kuptoj se situata është shumë e vështirë. Por më lejoni të kujtoj se në kohën e epidemisë së Covid-19, kur pati rritje çmimesh, u prek edhe Ukraina.
Çmimet po rriten edhe në Ukrainë, por përveç kësaj njerëzit tanë vriten. Kështu që kur filloni të numëroni qindarkat në llogarinë tuaj bankare ose në xhepin tuaj, ne bëjmë të njëjtën gjë dhe numërojmë viktimat tona.”– tha ajo.
Komentet e zonjës Zelenska pasojnë sugjerimin e kryeministrit Boris Johnson gjatë vizitës në Kiev muajin e kaluar se familjet në të gjithë Evropën do të duhet të durojnë krizën e kostos së jetesës dhe të “qëndrojnë në kurs” me Ukrainën për të kundërshtuar agresionin e Rusisë.
Në Mbretërinë e Bashkuar, norma e inflacionit parashikohet të arrijë nivelin më të lartë të 42 viteve prej 13.3% këtë vit, ndërkohë që ekonomia pritet të tkurret për më shumë se një vit.
