Shqipëria është duke u përgatitur fuqishëm për hapjen e negociatave në vitin 2019. Me qëllim që vitin e ardhshëm të marrë një përgjigje pozitive nga vendet e Bashkimit Evropian, Këshilli i Ministrave ka vendosur që në çdo bashki të krijohet struktura e integrimit evropian si njësi bazë e vetëqeverisjes vendore. Por cili do të jetë funksioni i këtyre strukturave? Këto struktura do të kenë një sërë funksionesh në kuadër të informimit dhe të zbatimit të një sërë aktivitetesh për qytetarët që kanë si qëllim procesin evropian.
Mbështetja dhe drejtimi i strukturave administrative të bashkisë për përgatitjen, zbatimin, monitorimin, vlerësimin dhe informimin për projektet e financuara nga programet e asistencës së Bashkimit Evropian për procesin e integrimit evropian në nivel vendor është një tjetër funksion i këtyre njësive.
Nëpërmjet këtyre strukturave do të bëhet informimi në mënyrë periodike i publikut dhe i grupeve të tjera të interesit për procesin e integrimit evropian, për politikat e BE-së dhe mundësitë për përfitim nga asistenca e Bashkimit Evropian, nëpërmjet këndeve të Bashkimit Evropian, të cilat krijohen dhe funksionojnë brenda bashkisë. Sakaq, duhet theksuar fakti se puna e këtyre njësive që do të ngrihen në bashki do të kontrollohet dhe mbikëqyret nga Ministria për Evropën dhe Punët e Jashtme si edhe nga Ministria e Brendshme.
Pra në thelb, përmes këtij vendimi të Këshillit të Ministrave, do të lehtësohet puna për informimin e bashkive dhe të qytetarëve për asistencën e Bashkimit Evropian për procesin e integrimit në familjen evropian si edhe për programet e ndryshme të financuara nga BE për vendin tonë nga ku do të kenë mundësi të përfitojnë edhe njësitë e vetëqeverisjes vendore. Kujtojmë që ky 1-vjeçar do të jetë i mbushur me sfida dhe prova për Shqipërinë me qëllim që në vitin 2019 vendimi nga BE të jetë pozitiv dhe më në fund të mund të ulemi në tryezën e bisedimeve.
