Kryesocialisti Edi Rama ka zhvilluar pasditen e sotme, një takim lidhur me prezantimin e programit për infrastrukturën 2030. Rama e ka nisur fjalën e tij duke thënë se, kjo është një strategji e bazuar në një plan konkret për t’u realizuar. Më pas Rama ka thënë se strategjia e prezantuar mbi investimet në akset rrugore dhe hekurudhore do të zhvillojnë, sipas tij, turizmin malor.
Këto investime do t’i japin edhe më shumë vëmendje zonave malore. Sipas tij, strategjia e prezantuar do të realizohet e gjitha për 9 vite. Kreu i qeverisë ka thënë se gjithë projekti infrastrukturor do të bazohet në aspiratën e Shqipërisë për turizmin.
“Duket si absurde, për të gjitha rrugët që është bërë një propagandë e madhe kanë qenë tendera të pafinancuara. Nëse një aks kushton 30 milionë euro, edhe nga buxheti janë vendosur 1 milionë euro. Edhe të tjerat kismet, të fillojmë. Shifra totale e borxhit ndaj kompanive ka qenë 700 milionë, pa llogaritur borxhin e shpërndarjes së energjisë që ishte 1.5 miliardë, ku popullin e ka shpëtuar fati nga një humnerë.
Nuk është bërë kurrë një rrugë me standarde që të duket një korridor europian. Është stimuluar pushtimi rrugës nga të dyja anët. Në rrugën që shkon poshtë drejt Fierit, do duhet t’i shmangemi disa herë aksit ekzistues, ndërkohë u pretendua që do ishte autostradë, ndërkohë që ajo nuk është autostradë.
Tani me këto projekte ne do kemi dy autostrada të kategorisë A, që lidhin Shqipërinë me gjithë rrjetin e BE-së.” – tha Rama.
Rama ka theksuar se investimet në zonat pranë vargmaleve, duke iu referuar investimeve në rrugën hekurudhore dhe në akset e reja kombëtare, do ta kthejnë, sipas tij, Shqipërinë në ‘Zvicrën dhe Austrinë e Ballkanit’. Sipas Ramës, Shqipëria, pas turizmit detar, do të ketë zhvillimin e saj në turizmin malor, ku sipas tij do të jetë një Austri dhe Zvicër e Ballkanit.
“Shqipëria është shumë e vogël, ka dy dete dhe ka 9 lumenj. Shqipëria është shumë e vogël dhe ka male afër detit. Këtu është rruga e Lurës që është drejt përfundit. E gjithë kjo që deti po i sjell Shqipërisë është e rëndësishme. Por më pas kjo do të jetë themeli që do ndërtohet më vonë. Do jetë një Austri dhe Zvicër e Ballkanit, me investimet në hekurudhë dhe në akset rrugore.” – tha Rama
Më tej, kryesocialisti Rama prezantoi dhe risinë që do të sjellë, sipas tij, ‘Qendra e re e Monitorimit të Trafikut’. Sipas tij, Rama tha se gjobat do të vijnë në telefonin e secilit drejtues me foton e tij personale.
“Sistemi është i tillë dhe do sinjalizojë këtu për një rritje shpejtësie, do sinjalizohet këtu, nuk do ketë më policë në rrugë. Punonjësit e policisë do jenë të organizuar në një mënyrë tjetër. Sistemi i kontrollit në kohë reale të shpejtësisë do bëjë që gjobat të jenë të menjëhershme dhe ajo që po bëjmë ne është që gjoba të vijë në telefonin tënd në një kohë reale.” – tha Rama
