Liria dhe Edmir Dine, nënë e bir ishin përballë njëri-tjetrit në rubrikën “Shihemi në Gjyq” të programit “E Diela Shqiptare” në Tv Klan.
Edmiri kërkonte nga nëna e tij që të ndjekë proceset gjyqësore, pasi siç shprehet ai, për shkak të vonesës së atësisë ndodhet sot mes katër rrugëve.
Nëna e tij, ndërkohë që ka qenë e martuar dhe me dy fëmijë nga martesa e parë, ka marrë lajmin nga mjekët se burri i saj vuante nga një sëmundje e rëndë dhe nuk do të jetonte më shumë se 6 vite. Disa vite më vonë teksa priste që bashkëshorti të ndërronte jetë, krijon një lidhje me një burrë tjetër, nga e cila vjen në jetë Edmiri, i cili ka mbajtur mbiemrin e njerkut të tij deri në vitin 2014.
Ndërkohë që Liria tregonte historinë e jetës së saj, drejtuesi i programit Ardit Gjebrea i çuditur nga historia, iu drejtua zonjës duke i thënë: “Shiko, ne të gjithë do vdesim një ditë, por s’mund të prenotojë gruaja ime burrin kur të vdes unë”.
Eni Çobani: Si ndodhi Liri? Pra, për ta kuptuar më mirë ju kishit qenë në një martesë 6-vjeçare nga e cila kishit 2 fëmijë?
Liria: Po.
Eni Çobani: Dhe në momentin që ju morët vesh që bashkëshorti juaj vuante nga një sëmundje e pashërueshme menduat se çdo bëhej me jetën tuaj…
Liria: Isha fare e re 33 vjeç.
Eni Çobani: Në këto momente ju vjen një propozim nga babai biologjik i Edmirit pavarësisht se ju ishit akoma e martuar dhe normalisht ju filluat një marrëdhënie dashurie ndërkohë.
Liria: Në fakt jo që në fillim. Kur bashkëshorti im u operua, doktori i dha vetëm 5-6 vjet jetë i dha dhe unë prisja që ai të ndahej nga jeta, e të vazhdoja një jetë të rregullt me babanë e Emirit. Në fillim ishim thjeshtë shokë.
Ardit Gjebrea: Por duke e ditur që ai do të ishte burri i ardhshëm.
Liria: Po patjetër. Unë kisha dy fëmijë të vegjël, nuk mund ta përballoja dot jetën e vetme. Isha 33 vjeç, mendova për ata dy jetimë.
Eni Çobani: Edmir ju i keni dëgjuar ndonjëherë këto nga nëna jote, apo të duken të çuditshme.
Edmir Dine: Për mua është pak e çuditshme, disa prej këtyre i kam dëgjuar, por nuk e kuptoj përse duhet t’i pranonte nëna ime të gjitha këto.
Ardit Gjebrea: Ndërkohë që babai ishte gjallë…
Eni Çobani: Nga momenti që zonja u lidh në martesë kishin kaluar 6 vjet, kishte dy fëmijë. Pas këtyre 6 viteve burri diagnostikohet me një sëmundje të pashërueshme dhe mjekët i thonë ky njeri mund të jetojë 5-6 vjet.
Sigurisht fjala u hap sepse fshati është i vogël. Babi biologjik i Edmirit i bën një propozim nënës së tij duke e respektuar martesën e saj, por që donte të dinte që pas vdekjes së burrit do martohej me të. Zonja nga njëra anë kishte bashkëshortin e sëmurë që i shërbente dhe nga ana tjetër kishte zotin Dine me të cilin takoheshin.
Ardit Gjebrea: Po takoheshit si shokë apo…
Liria: Po si shokë. Pa u ndarë burri nga jeta ne ishim shokë. Kishim komunikim, por jo si burrë e grua.
Ardit Gjebrea: Fëmija ka lindur pasi vdiq bashkëshorti?
Liria: Jo, ka lindur më përpara sepse sëmundja vazhdoi më shumë se 6 vite. Në kohën që unë prisja që burri im të ndahej nga jeta, nuk mund ta ndaja pa vdekur sepse më ai më tha: “Jam i gatshëm të bëj çdo gjë për ty dhe dua të më mbash deri në fund. Dua atë vdes pranë fëmijëve dhe meje”. Unë ia mbajta premtimin deri në fund.
Ardit Gjebrea: Duke bërë edhe Edmirin gjatë asaj kohe…
Liria: Babi i Edmirit e pa që koha po zgjatej, mosha po ikte dhe donte një trashëgimtar. Sepse dihej që jeta e burrit tim të parë do mbaronte…
Ardit Gjebrea: Babai i Edmirit ta tha këtë gjë ndërkohë që ju ishit me bashkëshortin?
Liria: Po, duke e ditur që ai do ndahej nga jeta.
Ardit Gjebrea: Ai pas 6 vitesh ndërroi jetë apo vazhdoi?
Liria: Jetoi edhe disa vite më pas ndërroi jetë.
Ardit Gjebrea: Shiko, ne të gjithë do vdesim një ditë, por s’mund të prenotojë gruaja ime burrin kur të vdes unë.
Liria: Asnjë nuk e di vdekjen, por doktorët 5-6 vite jetë i dhanë.
