Një sukses i madh për një artiste shqiptare në natën e ceremonisë së 98-të të ndarjes së çmimeve Oscar. Aktorja nga Kosova, Luana Bajrami, është ngjitur në skenën e Oscars pasi filmi ku ajo ka rolin protagonist, “Dy persona shkëmbejnë pështymë” (Two People Exchanging Saliva), u shpall Filmi më i mirë me metrazh të shkurtër.
Bajrami u ngjit në skenë bashkë me ekipin e filmit për të pranuar çmimin, ndërsa kur u përmend prejardhja e pjesëmarrësve, ajo u përshkrua si aktore nga Kosova. Filmi u duartrokit edhe për faktin që është realizuar nga një shumicë grash.
Filmi e ka në qendër intimitetin dhe konsumizmin, ku prekja romantike, veçanërisht puthja, është e ndaluar dhe e dënueshme me vdekje.
Pas këtij vlerësimi kanë reaguar edhe Qendra Kombëtare e Kinematografisë e Shqipërisë dhe ajo e Kosovës.
“Një moment i veçantë krenarie për kinemanë kosovare është pjesëmarrja e aktores Luàna Bajrami, e cila është pjesë e kastit të këtij projekti fitues. Pas sukseseve të vazhdueshme në skenën ndërkombëtare të filmit, Bajrami vazhdon të përfaqësojë me dinjitet talentin e artistëve kosovarë në industrinë botërore të kinemasë”, vërehet në postimin e bërë nga Qendra Kinematografike e Kosovës.
Ndërsa në postimin e Qendrës së Kinematografisë në Shqipëri vërehet se ky vlerësim nuk është vetëm një triumf personal i Luanës, “por një dëshmi e fuqisë dhe talentit të pashtershëm që artistët tanë po tregojnë në skenat më prestigjioze të botës.”
“Ky moment shënon një gur themeli për filmin shqiptar dhe na mbush me shpresë për rrugëtimin tonë të përbashkët drejt majave të artit botëror”, thuhet në postim.
Filmi e ka ndarë çmimin bashkë me “The Singers”, [Këngëtarët] – vendim i rrallë në ndarjen e këtyre çmimeve.
