Qeveria shqiptare pret edhe këtë vit një raport-progresi pozitiv për rrugëtimin drejt anëtarësimit nga Komisioni Europian.
Por kryeministri Edi Rama nuk duket dhe aq optimist për qëndrimin që do të mbajë Këshilli Europian që do të mblidhet në fund të Presidencës franceze, sa kohë që ngërçi mes Maqedonisë së Veriut dhe Bullgarisë ende mbetet i pazgjidhur.
Gjatë një interviste për mediat dje në Bruksel, shefi i qeverisë u shfaq i vendosur, teksa zbuloi se në qershor Shqipëria do të ndahet nga Maqedonia dhe se sipas tij, është absurde që Tirana zyrtare të mbahet peng në këtë proces, për shkak të konfliktit mes Sofjes dhe Shkupit. “Ne jemi në pozicionin që dihet, do presim dhe presidencën franceze.
Këtu çështja është tek Bullgaria që ka marrë peng Maqedoninë dhe që si rezultat, ka bërë që ne të jemi peng i një ngërçi të madh që ne nuk kemi lidhje fare. Ndërkohë, besoj që të gjithë e kanë të qartë që kjo situatë nuk mund të vazhdojë më gjatë.
Megjithatë, ne do të ndryshojmë menjëherë kurs, siç e kemi thënë dhe siç e kemi marrë nga Këshillimi Kombëtar në rast se nuk do të kalojë në fazën tjetër vendi ynë për t’u ulur formalisht në tryezë për negociata”, deklaroi ai.
Megjithatë më optimist duket për ecurinë e nismës Ballkani i Hapur nisur dhe nga gatishmëria e Kryeministrit të ri të Malit të Zi për t’ju bashkuar Shqipërisë, Maqedonisë dhe Serbisë. Por fakti që nuk janë në një mendje me Kosovën sa i takon Open Balkan, për Kryeministrin shqiptar nuk duhet të vendosë aspak në dyshim që Shqipëria e mbështet çdo nismë të saj që e integron në organizatat ndërkombëtare siç është aplikimi në Këshillin e Europës.
“Ne nuk kemi asnjë ekuivok. Ne jemi në mbështetje absolute të Kosovës në çdo hap dhe për çdo gjë që lidh Shqipërinë, Kosovën dhe komunitetin ndërkombëtar. Kur vjen puna tek demarshet e Kosovës në arenën ndërkombëtare, ne jemi 100% me Kosovën. Serbia sigurisht është në të drejtën e vetë të mendojë krejt ndryshe, na vjen keq për Serbinë në këtë rast, por ne do të mbështesim Kosovën”, nënvizoi Rama.
