Sali Berisha vijon të nxjerrë në median e familjes të gjithë bashkëpunëtorët e tij ndër vite për të kritikuar Lulzim Bashën dhe për të kërkuar dorëheqjen e tij.
Së fundmi, ish anëtari i Këshillit Kombëtar të PD, Bislim Ahmetaj, ka shpërthyer në akuza ndaj Lulzim Bashës, pasi përjashtoi ish-kryeministrin Sali Berishës nga grupi parlamentar.
Ai thotë se Berisha e ka vendosur në krye të PD-së Lulzim Bashën dhe më pas e ka mbrojtur duke i dhënë mbështetjen e tij të fuqishme.
‘Shpallja non grata e Sali Berishës është një ngjarje shumë e rëndë e demokracisë shqiptare, pasi qytetarët kanë jetuar 30 vite me të.
Është ky Sali Berishë që ka bërë një revolucion në vend, ka sjellë demokracinë, ka krijuar piramidën më të madhe të marrëdhënies me SHBA.
Kemi 8 vite që e mbajmë kryetar Lulzim Bashën, pasi ka pasur mbështetjen e fuqishme të Sali Berishës. E ka mbajtur Bashën në krye të PD-së, pa asnjë meritë dhe pa asnjë mundësi për ta sjellë partinë në pushtet.
Këtë e ka bërë deri para 3 ditësh dhe me një pafytyrësi, një mi ambasadash. Duhej të shtronte propozimin në Këshillin Kombëtar të PD-së dhe të bëhej votim i fshehtë. Nëse do ta hiqte Këshilli Kombëtar, Berisha nuk do e kundërshtonte. Por ai e bëri këtë me një vendim personal.
Ne ja kemi kërkuar dorëheqjen Bashës që kur ka humbur herën e parë, të dytë dhe të tretë. Ai nuk e njeh institucionin e dorëheqjes. Anëtarësia e PD-së, për gjestin e ulët që ka treguar Basha ndaj njeriut që e ka vendosur në atë post, do të ndërgjegjësohet.
Besoj se këtë vjeshtë ai do të largohet. Nëse do të respektohet institucioni i votës në PD, ne vijmë shumë shpejt në pushtet.
Do të nisim takimet në bazë. Nëse nuk do të bindet kupola, atëherë ne do të bëjmë një referendum brenda partisë’, tha Ahmetaj.
