Kreu i Prokurorisë së Posaçme, Arben Kraja, pak ditë më parë paralajmëroi se viti 2021 do të jetë makth për të korruptuarit. Por cilat janë disa nga dosjet që ka në dorë SPAK dhe që mund të trazojnë politikën?
Në Prokurorinë e Posaçme janë paditur shumë zyrtarë të lartë, por në krye të listës si emra të njohur janë ish-kryeministri Sali Berisha dhe presidenti Ilir Meta. Ndaj zotit Berisha SPAK ka në dorë 3 padi, ku të tria janë në shqyrtim. Dosja më e fundit është ajo e privatizimit të kompleksit Partizani.
Pak ditë më parë kreu i grupit të PS, Taulant Balla paditi Berishë, ish-ministrin Arben Imami dhe Jamarbër Malltezin. Për ta kanë nisur hetimet. Një dosje akoma dhe më e bujshme është ajo e padisë së Izet Haxhisë. Ky i fundit ka paditur zotin Berisha për 31 vepra penale dhe ka dhënë me dhjetra orë dëshmi në ish-Prokurorinë e Krimeve të Rënda.
Pas shkrirjes së saj dosja ka kaluar te SPAK dhe është ende në proces hetimi. Dosje tjetër është ajo e aferës CEZ-DIA. Bëhet fjala për një padi që ka bërë juristi Romeo Kara.
Për privatizimin e CEZ u pushuan hetimet, ndërsa dosja CEZ-DIA është akoma dhe më e fortë. Dosja ishte te Krimet e Rënda dhe u transferua te SPAK, ku është ende në proces hetimi. Ndërkohë në këtë dosje është paditur dhe presidenti Ilir Meta.
Sipas juristit Kara, ky i fundit ka pasur rol më thelbësor në këtë skandal. Në padi jepen detaje se si presidenti ka ndikuar te çekët dhe marrëdhëniet me ish-administratorin e DIA, Kastriot Ismailaj.
Dosje për 4 emra të mazhorancës
Të rrezikuar do të jenë dhe kampi mazhoritar. Sipas burimeve, SPAK po heton në prapaskenë për 4 emra të rëndësishëm në mazhorancë. Përtej padive që ka bërë opozita, mësohet se në mes kanë ndërhyrë ndërkombëtarët, të cilët kanë sjellë 4 dosje me të dhëna për 4 emra të rëndësishëm, të cilët për arsye hetimore nuk po i nxjerrim.
Sipas burimeve nga SPAK, agjencitë partnere kanë zbuluar llogari bankare në emër të këtyre personave, para kryesisht të dërguar në parajsa fiskale apo kompani offshore. Individët në fjalë kanë investuar miliona euro në kompani anonime, por gjithçka është zbuluar dhe pritet që SPAK vitin që vjen të bëjë goditje tepër të bujshme. Bëhet fjalë për 4 emra mjaft të njohur dhe ndërkombëtarët kanë sjellë gjithë të dhënat në Shqipëri.
Emrat e tjerë
SPAK ka rreth 700 dosje në proces hetimi dhe 209 prej tyre janë dosje korrupsioni. Sipas burimeve, në listë janë 2 ish-kryebashkiakë të LSI dhe një kryebashkiake e PS. Dje Prokuroria e Beratit ka dorëzuar në SPAK një padi ndaj kryebashkiakes së Dimalit. Ndërkohë janë disa padi që opozita ka bërë ndaj ministrave aktualë.
Një dosje e fortë është ajo e shembje së teatrit ku janë paditur ministrja e Kulturës, kryebashkiaku i Tiranës, ish-ministri i Brendshëm. Presidenti Ilir Meta ka bërë dy padi të bujshme në SPAK. Ai ka paditur ministren e Drejtësisë për botimin në Fletoren Zyrtare të vendimit që e rendiste Arta Vorpsin në krye të listës për në Kushtetuese. Po për debatin e Kushtetueses ka paditur dhe ish-kreun e KED, Ardian Dvorani.
PD ka paditur po ashtu për abuzime me tenderat ministren e Mbrojtjes, Olta Xhaçka dhe ministren e Shëndetësisë, Ogerta Manastirliu. Një dosje tjetër është ajo e inceneratorëve. Pak javë më parë çështja e inceneratorëve shkaktoi debat të fortë dhe për opozitën është një ndër dosjet më korruptive. Dosje të tjera të forta janë ato të hetimit për gjyqtarët e Gjykatës së Lartë dhe asaj Kushtetuese të ngelur në veting.
Vetë Kraja në një intervistë që dha pak ditë më parë paralajmëroi se hetimet po ecin para. Një dosje tjetër e rëndësishme është ajo e hetimeve që kanë nisur për deputetin socialist Ervin Bushati. Ky i fundit u padit për fshehje pasurie dhe SPAK ka nisur hetimet. Një padi e fortë është dhe ajo e koncesioneve të dhëna në shëndetësi gjatë kohës që ministër ishte Ilir Beqaj. Pra bëhet fjalë për shumë çështje me rëndësi, zbardhja e të cilave sigurisht do trazonte politikën./Kliti Topalli
