Ish-Drejtori i Përgjithshëm i Rrugëve, Dashamir Xhika, është vetëm një nga ish-zyrtarët e lartë të punësuar nën siglën e Lëvizjes Socialiste për Integrim. Motoja elektorale “Një shans për të gjithë”, duket se është keqkuptuar nga disa prej ish-drejtorëve, tashmë të arrestuar.
21 Shkurt 2017 – Ish-drejtori i Përgjithshëm i Burgjeve, Artur Zoto vihet në pranga nën akuzën për korrupsion. Zoto u arrestua me kërkesë të prokurorisë me akuzën “korrupsion pasiv” në kuadër të hetimit të nisur pak kohë më parë, ku në pranga u vu edhe ish-zëvendësi i tij, Iljaz Labi. Artur Zoto, pjesë e LSI u emërua drejtor i Burgjeve në vitin 2013, ndërsa në korrik të 2016 dha dorëheqjen pas skandalit me tenderat e ushqimeve që përfshiu institucionin që drejtonte.
Më 29 shtator 2014 – Policia e Durrësit, arrestoi drejtorin e Inspektoriatit të Mjedisit Durrës, Genc Balla, bashkë me vartës të tij, të cilët shtrëngonin për mitmarrje një kompani shqiptaro-kineze. Edhe Balla ishte i emëruar nga LSI.
Në tetor 2014 u arrestua drejtori i Burgut Rrogozhinë, Ferdinand Doksani së bashku me dy mjekë, me akuzë se krijonin raporte false mjekësore për të dënuarit, me qëllim që këta të fundit të merrnin leje shpërblyese të pamerituara. Edhe Doksani ishte i emëruar nga strukturat e LSI-së.
Në nëntor të 2014, Policia e Lushnjës ndaloi me urdhër të Prokurorisë, drejtoreshën arsimore në këtë qytet, Luiza Tabaku, e cila u merrte shuma të konsiderueshme mësuesve të rinj me qëllim për ti punësuar.
Më qershor 2015, Policia e Tiranës me urdhër të Prokurorisë arrestoi Drejtorin Rajonal të Fondit të Detyrueshëm të Kujdesit Shëndetësor, Pjerin Xhuvani, I cili ishte pjesë e zyrtarëve të dyshuar për abuzim me fondin e ilaçeve të rimbursueshme, ku dëmi llogaritej në vlerën e 500 mijë eurove. Xhuvani ishte kryetar I LSI-së në Elbasan.
Më 27 qershor 2015, arrestohet në Tiranë, drejtori i Vlerësimit Mjedisor në Ministrinë e Mjedisit, Albert Topçiu, ndërsa po merrte 2 mijë euro ryshfet, drejtuesit të një subjekti ndërtues. Albert Topçiu ishte njëkohësisht edhe drejtues I degës së LSI-së Fier.
Më 14 korrik 2015 arrestohet drejtori i Hipotekës Lushnjë, Elvis Bajazi bashkë me shoferin e institucionit. Ata u kapën në kushtet e flagrancës, duke marrë ryshfet për dhënien e një certifikate pronësie në Lushnje.
Më 4 nëntor 2015 është Robert Shtëmbari, Drejtori i Emergjencave Civile në Lushnjë, i cili u me akuzën korrupsion pasiv të personave që ushtrojnë funksione publike. Shtëmbari i kishte kërkuar 1 milion lekë një qytetari në Lushnjë në këmbim të një vendi pune. Vdiq në Burgun e Rrogozhinës, më 16 dhjetor 2015, pas një infarkti.
Më 1 shkurt 2018 arrestohet Dashamir Xhika, ish- Drejtori i Autoritetit Rrugor Shqiptar (ARRSH), Dashamir Xhika, pas dosjes të një dëmi rreth 50 milion euro, shkaktuar për ndërtimin e rrugës Tiranë- Elbasan.
