Tritan Shehu ishte pjesë e deputetëve të PD, të cilët iu sulën kreut të SPAK-ut Altin Dumani, duke e akuzuar se po mbante të izoluar liderin e tyre Sali Berishën pa asnjë akuzë.
–Shehu: Përse Berisha mbahet i izoluar? Kush fshihet pas kësaj loje? Po shkelni parimet me të katër këmbët, a nuk gjykoni se bëheni pjesë e politikës, duke e kthyer Berishën në një të burgosur politik?
–Dumani: Ju thoni se nuk ka akuzë, por edhe vetë vendimi i gjykatës e ka bërë të qartë veprën penale. Lëshuar akuza të rënda drejt SPAK dhe mua, nuk jam pjesë e politikës nuk kam asnjë lloj lidhje me politikën e kam ndërtuar jetën jashtë politikës, besoj që ka qenë një karrierë normale.
Ashtu si Flamur Noka, i cili është nën hetim pasuror, edhe Tritan Shehu duket se është në konflikt interesi, pasi mund të jetë objekt i SPAK-ut për pasuri të dyshimtë, korrupsion, pastrim parash, ndikim të paligjshëm etj.
Edhe pse pa historik biznesi dhe me pagë si deputet, Tritan Shehu ka një pasuri me vlerë miliona euro.
Deputeti i PD-së Tritan Shehu deklaron ambiente banimi me sipërfaqe 440 m2 në Tiranë, me vlerë 220 mijë euro, transformuar në ‘Guest House’ ose bujtinë.
Një sipërfaqe e tillë kushton të paktën 800 mijë euro.
Tritan Shehu deklaron një apartament 195 m2, me vlerë 2.5 milionë lekë, një tjetër apartament 135 m2 me vlerë 63 mijë euro, apartament 105 m2 me vlerë 135 mijë euro dhe shtëpi në Plazh Durrës, me sipërfaqe 138 m2.
Shehu deklaron gjithashtu se është pronar me 1/3 të një shtëpie dy kate në Gjirokastër si dhe i një shtëpie të pabanueshme në Himarë, i 3 mijë m2 tokë në Palasë, Himarë, është pronar me 1/4 i 1260 m2 tokë në Shkozet të Durrësit, i 180 m2 tokë, pronar me 1/3 të 100 hektarë tokë në Gjirokastër, ndërsa ka në pronësi të plotë një makinë BMW X5.
Tritan Shehu deklaron 32 mijë euro pagë nga Universiteti Zonja e Këshillit të Mirë, ndërsa thotë se do të shesë një dyqan 30 m2 dhe një apartament 71 m2 në Durrës.
Afera me ‘Zoja e Këshillit të Mirë”
Tritan Shehu ka një histori të dyshimë me biznesin që zhvillon prej 30 vitesh kompania universitare, klinike, spitalore e farmaceutike “Zoja e Këshillit të Mirë” në Tiranë, mbi pronën publike, sot pa asnjë lidhje me Kishën Katolike shqiptare, por është kthyer në një parajsë fiskale.
Shehu është Zv/Rektor i Universitetit Katolik Zoja Këshillit të Mirë, me rrogë gati 3 mijë euro në muaj.
Marrëveshja është firmosur më 29 shtator 1993, nga ish-ministri i Shëndetësisë, Tritan Shehu dhe Imzot Rrok Mirdita, Arqipeshkëvi i Durrësit e Tiranës; me asistues formal, ish-Zv/ministrin e Shëndetësisë Besim Nuri dhe Imzot Ivan Dias, Nunci Apostolik i Shqipërisë.
Qëllimi i dhënies me qira, ishte që në atë ndërtesë të gatshme, Kisha Katolike të hapte vetëm spitalin “Zoja e Këshillit të Mirë”, i cili sipas nenit nr. 9 të marrëveshjes, do shërbente si “Shtëpi trajtimi mjekësor” human për njerëzit e varfër pa dallim feje.
Përveç godinës, iu dha në përdorim falas edhe 50 mijë m2 truall, për të krijuar mjedise në funksion të pacientëve, personelit mjekësor dhe infrastrukturës mbështetëse në shërbim të spitalit “Zoja e Këshillit të Mirë”.
Në pazar me Tritan Shehun që ishte bërë pjesë biznesi e administrimi i qendrës “Zonja e Këshillit të Mirë”, ish-kryeministri Ilir Meta ia shiti godinën e 50 mijë m2 truall me çmim 0.001 lekë/m2, ose në total 50 (pesëdhjetë lekë).
Mirëpo kjo godinë u bë universitet me fakultet mjekësor, farmaceutik shkenca ekonomike, politike, juridike, sociale e arkitekturë, me pagesë 2340 Euro deri në 4760 Euro në vit, por dhe mjedise për biznese me qira, si dyqane farmacie, fizioterapi, qendër gjuhësh të huaja, bar-kafe, poliklinikë e deri parkim makinash.
Universiteti “Zoja e Këshillit të Mirë” është kthyer në një ‘makineri të vjeljes së parave’, falë diplomave të dyshimta që vijnë nga Italia dhe shpërndahen këtu për studentët shqiptarë, por edhe për ata italianë që nuk arrijnë të diplomohen në Itali.
Më datë 26 janar 2023, u kap në flagrancë, pas kalimit të zonës së Doganës, në dalje të Republikës së Shqipërisë, presidenti i univestetit shtetasi Jerome Ndo Mih, i biri i Benedict dhe i Angelina, i datëlindjes 28.09.1973, lindur në Kamerun dhe banues në Tiranë. Ky shtetas priste të udhëtonte nga aeroporti i Rinasit, në Romë dhe gjatë kontrollit fizik në valixhen e tij dhe në çantën e dorës, iu gjetën të fshehura në çantë dhe të paketuara e të futura në zarfe, plot 42.300 euro. Për këtë arsye, Jerom u shoqërua për në komisariatin e policisë Rinas.
Akuza për korrupsion
Ish-ministri demokrat dhe mjeku i njohur Halim Kosova, akuzoi tre vjet më parë Tritan Shehun dhe Genc Rulin për korrupsion, përkatësisht me 500 mijë dhe 100 mijë euro.
“Ça ka Tritani me mua? Kur kam qenë ministër është po ky që ka ndërhyrë që unë të mbyll sytë për një tender korruptiv, për një ilaç për leuceminë. Ky është i joni më tha, për atë personin. Edhe më erdhi personi në zyrë, më tha jo kështu po ashtu ,e i thashë: mos më vidh sa të jem unë këtu”, ka deklaruar mjeku Kosova.
Tritan Shehu, kontrandanda e naftës
Tritan Shehu ka qenë edhe administrator i firmës “Shqiponja” në vitet 1993-1996, me të cilën Sali Berisha furnizoi me naftë Millosheviçin duke thyer embargon e Perëndrimit ndaj tij. Në fund kompaninë ia “kontabilizoi” Genc Pollo duke blerë Tajvanin dhe disa bingo nëpër Tiranë.
Spiun i ish Sigurimit
Gazetari i ndjerë Nebil Çika ka deklaruar se Tritan Shehu ka qenë spiun i ish Sigurimit të Shtetit. “Një nga njerëzit që ka udhëhequr rininë komuniste në prishjen e kishave dhe xhamive ka qenë Tritan Shehu, dihet nga të gjithë e ke në gazeta dhe revista. Letrën që ja dërguan shokut Enver, që këta janë reaksionarë duhen vrarë, e ka firmosur ky. Ishte sekretari i rinisë i gjimnazit, kjo mjafton që ky të mos jetë përfaqësues i besimtarëve dhe i të përndjekurve politikë”, ka deklaruar Çika.
