Gazeta gjermane “Bild” ka publikuar ditën e djeshme plot 16 episode të reja me përgjime për blerjen e votave në Shqipëri, referuar të ashtuquajturës dosjes “184”, sa i takon zgjedhjeve vendore të vitit 2016 në qarkun e Dibrës. Në këto përgjime në biseda sipas gazetës, kanë dalë mjaft zyrtarë të lartë si kryeministri Edi Rama, ish-ministri i Energjisë, Damian Gjiknuri, ish-deputeti Pjerin Ndreu dhe Artan Gaçi.
Kështu në një prej bisedave të përgjuara, e cila mban numrin një, dëgjohet kryeministri Edi Rama që flet me kryetarin e fushatës zgjedhore në zonën e Maqellarës, në atë kohë punonjës i thjesht në komunën Maqellarë e që mercenari i Bild në publikimet e tij e emëron Drejtor të Emigracionit Arben Keshin sot punonjës i thjeshtë policie në drejtorinë e policisë Dibër, teksa ky i fundit e informon se rezultati i zgjedhjeve do të jetë sipas pritshmërive.
Në bisedë, Rama e pyet nëse u arritën objektivat, pra nëse PS ka fituar apo jo, por në asnjë moment nuk flitet as për blerje votash as për manipulime. “Hë mo, si duket? E ke realizuar objektivin?”, pyet Rama. Ndërkohë që, referuar përgjimeve të publikuara nga gazeta përfaqësuesi i PS e qetëson kryeministrin Edi Rama, duke e siguruar që nga informacionet e marra nga komisionerët, kishte pritshmëri të mëdha. “Them që po. Me atë që po na thonë komisionerët e kemi realizuar”, përgjigjet zyrtari Keshi.
Gaçi, Ndreu dhe Keshi
Në përgjimin e dytë të publikuar nga gazeta gjermane “Bild” kryeministri Edi Rama përshëndet përmes deputetit Artan Gaçi punën e bërë nga Arben Keshi, të cilin Edi Rama e vlerëson për suksesin. Më konkretisht, Gaçi shpreh respektin më të lartë dhe mirënjohjen që kryeministri Edi Rama ka për drejtorin Arben Keshi.
Sipas tij, Edi Rama ia atribuon rezultatet në Maqellarë, rajon i Dibrës, si e gjitha një meritë e drejtorit. “Mirë, rrimë. Bëmë qejf me shefin e madh (kryeministrin Edi Rama). Me superlativa për ty”, deklaron Gaçi. Ndërsa drejtori Keshi e falenderon ish-deputetin Gaçi. “Faleminderit! Inshallah kthehen në realitet se ngela kështu. U bënë 3 vite”, thekson Keshi.
Ndërkohë në përgjime del edhe ish-deputeti Pjerin Ndreu, i cili është duke folur me drejtorin e Arsimit në Dibër, Dritan Gjeçi dhe i kërkon që ti telefonojë drejtorit të shkollës Reshat Elezi dhe t’i thotë që të deklarojë votën hapur për PS. “Mirëmëngjesi! Pjerin Ndreu jam. Si je? A je mirë? Si ia kalon? Bëja një telefon këtij Reshat Elezit, këtij drejtorit të Reçit. Thuaji drejtorit të shkollës, thuaji të deklarojë votën hapur se ato mesazhet që i çon poshtë e përpjetë thuaj nuk janë shumë të këndshme.
Deklaroje veten hapur atje se e ke për PS ndryshe ditën e hënë tregoja vetë se ku fluturon”, deklaron Ndreu. Ndërsa drejtori i Arsimit në Dibër, Dritan Gjeçi zbaton menjëherë porosinë e deputetit socialist Ndreu dhe telefonon drejtorin e shkollës së Reçit, Reshat Elezin.
PD mobilizon bandat
Por nga biseda del dëshmia, të cilën gazeta “Bild” e anashkalon pa e përmendur fare, mbi veprimet e një bande të Partisë Demokratike të drejtuar nga ish-ministri i Brendshëm, Flamur Noka që përndiqte dhe kërcënonte përfaqësuesin socialist. Në bisedë Arben Keshi tregon për një pritë gjatë natës, ku 50 veta e kishin ndjekur, por ai i shpëtoi në minutat e fundit duke u futur tek shtabi pranë hotelit ku ai flinte, por i kanë dhunuar djalin e tij.
Pra, më shumë se blerje e votave nga ky përgjim del përpjekja për ta mbrojtur votën nga banda e Lulzim Bashës. Referuar një njoftimi të policisë asokohe bëhet e ditur se PD dërgoi gjithë ish-ministrat e saj në Dibër dhe Flamur Noka, arriti deri aty se ta rrihte votuesit dhe t’iu vinte pistoletën në kokë.
Madje, nuk i ndaloi as policisë dhe në përpjekje për t’u arratisur, u përplas. “Sipas deklarimeve të të dëmtuarit, deputeti F.N dhe shoferi i tij kanë qenë të armatosur me Pistoleta. Ata i janë prezantuar të dëmtuarit shtetasit D. I. se jemi punonjës policie dhe do të kontrollojmë mjetin dhe personat”, thuhet ndër të tjera në njoftim.
Nga ana tjetër, në përgjimet e publikuara del në biseda të tjera një biznesmen guroresh është regjistruar duke mësuar votuesit për mënyrën si duhej plotësuar fleta e votimit tek emri i kandidatit të PS-së.
Rigels Seliman
