Nga Bledi Lumani
Kur Albin Kurti vendosi t’i hyjë politikës, bëri një gjest të fortë simbolik: Shiti apartamentin e tij, për të financuar Lëvizjen Vetëvendosje.
Ndërsa të tjerët përfitonin nga politika për t’u pasuruar e blerë vila e apartamente, ai kërkoi të tregojë me gjestin e tij, se kishte hyrë në politikë për të dhënë, jo për të marrë.
20 vite pas betejave të tij të pakompromise, ai është shpërblyer, duke marrë mandatin për t’u zgjedhur kryeministër i Kosovës, në një moment të vështirë për këtë vend, ku varfëria dhe korrupsioni ecin krah për krah.
Nuk e di a ia ka përmendur shembullin e tij Lulzim Bashës, kur e takoi pak ditë më parë në Tiranë, por do i kishte bërë nder të madh, nëse do ia kujtonte çfarë bëri në fillimet e veta.
Jo se Basha do të reflektonte, por të paktën mund të ishte vënë në siklet dhe ndoshta mund ta kishte shmangur këtë “bezdisjen” e fundit të debatit për transferimin e tij, në një kompleks ku jetojnë pasanikët e Tiranës, që për pronar ka një nga ata oligarkët që thotë se do t’i ndëshkojë kur të vijë në pushtet.
Të jemi të qartë, nuk është mëkat apo krim të marrësh me qira, apo të blesh një vilë dhe të duash të jetosh mirë. Kjo është një dëshirë njerëzore, që e kanë të gjithë, dhe fundja shumica për të punojnë e jetojnë.
Por, kur ke vendosur që të ndryshosh rrjedhën e historisë së një vendi të korruptuar dhe të pashpresë si Shqipëria, ashtu siç ka premtuar Lulzim Basha se do të bëjë, duhet të japësh shembullin i pari, se e ke seriozisht këtë punë!
Përndryshe, nuk të merr njeri seriozisht.
Sepse nuk mund t’iu flasësh njerëzve gjithë ditën për varfërinë e korrupsionin që na ka pllakosur, kur vetë shkon e ble, apo merr me qira, vilë në rezidencën me luksoze në Tiranë, paguan dhjetëra mijëra euro në vit për shkollimin e fëmijëve, kalon fundjavat në qytetet më të shtrenjta të Europës.
Apo që vete e ndërton pallate dhe pastaj bën pazar me atë që e akuzon nga mëngjesi në darkë, si më të korruptuarin dhe problemin e këtij vendi, për të marrë nja 13 milionë euro, disa drejtori me lekë e vënde punë, e historira të tjera si këto, që të gjithë tashmë i dinë dhe është e bezdisshme t’i përsërisësh.
Tani jo se ka njeri iluzionin që Lulzim Basha mund të frymëzojë një ndryshim real në politikën shqiptare, sepse gjatë karrierës së tij politike, nuk ka dhënë asnjë shenjë të tillë, por të vesh e të jetosh në dy vila luksoze, në kulmin e dëshpërimit që ka kapluar shoqërinë shqiptare, pse nuk kemi edhe ne një Albin që të rrëzojë kastën e vjetër e të korruptuar të politikës, siç proklamojnë gazetarët pranë tij, është më shumë se budallallëk.
Është një shembull se dhe e “ardhmja” e politikës, siç e konsideronte veten në një intervistë të pak muajve më parë, është si e “tashmja” e politikës, që mban emrin e Edi Ramës, ose edhe më keq.
Të paktën Edi Rama është pajtuar me idenë se të gjithë janë njësoj dhe nuk bën më “engjëllin”, edhe pse thotë se më të mirë se ata nuk ka.
Dhe kur sheh shembullin e Lulzim Bashës, të bën vërtet ta besosh atë që thotë.
Fundja çfarë mund të presësh nga një njeri që hyn në politikë me një milionë euro pasuri, që asnjëherë nuk është marrë vesh si i ka bërë.
