Komisioni i Jashtëm i Parlamentit Europian votoi me shumicë dërrmuese raportin me rekomandimet e këtij institucioni për zgjerimin me vendet e Ballkanit Perëndimor, në një takim të zhvilluar nëpërmjet video-konferencës. Raporti, i hartuar nga eurodeputeti Tonino Picula (S&D), u miratua me 57 vota pro, 5 abstenime dhe 7 kundër.
Komisioni i Jashtëm i PE-së votoi raportin me rekomandimet për
Ndër rekomandimet e miratuara janë kriteret për të siguruar zgjedhje të lira, të ndershme dhe transparente, në përputhje me standardet ndërkombëtare dhe forcimin e rolit të shoqërisë civile si një lojtar i rëndësishëm në konsolidimin demokratik.
“Mbajtja e derës së hapur për vendet e Ballkanit Perëndimor është në interesin politik, të sigurisë dhe të Bashkimit Europian”, -thonë eurodeputetët e Komisionit për Punë të Jashtme.
“BE-ja duhet të sigurojë që metodologjia e saj e zgjerimit të mbështesë reformat dhe të sigurojë anëtarësimin e plotë, si qëllimin përfundimtar për vendet e pranimit”, theksuan eurodeputetët e Komisionit për Punë të Jashtme në rekomandimet e tyre për Ballkanin Perëndimor, të miratuar të hënën.
“Vendimi për të hapur bisedimet e pranimit me Shqipërinë dhe Maqedoninë e Veriut ishte në interesin e vet politik, të sigurisë dhe të BE-së”, thonë eurodeputetët. Ata gjithashtu i bëjnë thirrje BE-së të lejojë liberalizimin e vizave me Kosovën sa më shpejt të jetë e mundur, si dhe të angazhojë nga afër përfaqësuesit e vendeve të Ballkanit Perëndimor në nismat e përbashkëta europiane (p.sh. politikat sektoriale dhe programet) përpara pranimit të tyre, përfshirë Konferencën për Ardhmërinë e Europës.
“BE-ja duhet të sigurojë që reformat në Ballkanin Perëndimor të përqendrohen në ndërtimin e kapaciteteve shtetërore, zbatimin e vendimeve gjyqësore, reformat gjyqësore dhe përpjekjet për të luftuar korrupsionin dhe krimin e organizuar”, thanë eurodeputetët. “BE-ja duhet të angazhohet gjithnjë e më shumë në zgjidhjen e çështjeve të pazgjidhura bilaterale në rajon, duke promovuar marrëdhëniet e fqinjësisë së mirë dhe bashkëpunimin rajonal”.
Eurodeputetët kundërshtojnë çdo ndërprerje të fondeve të ndihmës para pranimit që mund të ngadalësojnë reformat në BE. BE-ja duhet të ketë prioritet projekte specifike në dobi të popullit të Ballkanit Perëndimor dhe të sigurojë që fondet para pranimit të ndahen në mënyrë transparente, proporcionale dhe jodiskriminuese, bazuar në treguesit e performancës që matin përparimin e vendeve përfituese në zbatimin e reformave.
Raportuesi i PE-së, Tonino Picula (S&D, HR) tha: “Ky raport është një shenjë e qartë e mbështetjes së Parlamentit Europian për aspiratat dhe përpjekjet e vendeve të Ballkanit Perëndimor për t’u bërë anëtare të BE-së, pasi të plotësohen të gjitha kriteret. Është gjithashtu një shenjë e qartë që ne mbështesim vazhdimin e procesit të zgjerimit në përgjithësi, pasi ka qenë një nga politikat më të suksesshme të BE-së. Politika e zgjerimit është gjithashtu një parakusht për të promovuar praninë e BE-së dhe interesin e saj strategjik në Ballkanin Perëndimor, kështu që duhet parë se është në interesin tonë të ndërsjellë”.
Më 26 mars, Këshilli i Europian vendosi të hapë negociatat e pranimit me Shqipërinë dhe Maqedoninë e Veriut. Para kësaj, në shkurt, Komisioni propozoi një metodologji të rishikuar që duhet t’i japë impuls të përtërirë zgjerimit të BE-së. Samiti për Ballkanin Perëndimor është planifikuar të mbahet para fundit të Presidencës Kroate në qershor.
Përveç Shqipërisë dhe Maqedonisë së Veriut, Mali i Zi dhe Serbia tashmë kanë filluar negociatat e pranimit, ndërsa Bosnja dhe Hercegovina dhe Kosova janë kandidatë të mundshëm.
