Kosova është bërë vendi i parë që ofron të pranojë azilkërkuesit e refuzuar të Britanisë si pjesë e planit të kryeministrit britanik Keir Starmer për “qendrat e kthimit” të emigrantëve.
Albin Kurti, kryeministri i Kosovës, tha se vendi i tij “dëshiron të ndihmojë Mbretërinë e Bashkuar” me përpjekjet e saj për të luftuar emigracionin e paligjshëm në këmbim të më shumë mbështetjes për të forcuar sigurinë e saj kombëtare kundër kërcënimeve nga Serbia dhe Rusia.
Duke folur para një samiti të liderëve të Ballkanit Perëndimor të organizuar nga Starmer në Londër të mërkurën, Kurti tha se po zhvilloheshin bisedime midis zyrtarëve nga Mbretëria e Bashkuar dhe Kosova.
Kjo e bën Kosovën vendin e parë që konfirmon interesin e saj në planin e Starmer për të krijuar një seri qendrash kthimi ku azilkërkuesit e refuzuar do të dërgoheshin pasi të kenë shteruar të gjitha rrugët e tyre të apelit në Mbretërinë e Bashkuar.
Ndërsa tema e qendrave të kthimit nuk është në axhendën zyrtare të samitit, Starmer shpreson të bëjë përparim në bisedimet me disa nga vendet pjesëmarrëse.
Milojko Spajic, kryeministri i Malit të Zi, tha se vendi i tij do të ishte i hapur për të negociuar një marrëveshje për qendrën e kthimit, por vetëm nëse Britania investonte ndjeshëm në infrastrukturën e saj, më konkretisht 8 miliardë euro për infrastukturën e hekurudhës.
Megjithatë, presidenca e Bosnjës dhe Hercegovinës, një organ me tre anëtarë që shërben si kreu i shtetit, tha se nuk kishte “asnjë qëllim, as ndonjë gatishmëri, për të hyrë në ndonjë marrëveshje që do të përfshinte pranimin e azilkërkuesve të refuzuar” nga Mbretëria e Bashkuar.
Edi Rama përsëriti kundërshtimin e tij ndaj përpjekjeve të Britanisë për të krijuar qendra kthimi, duke thënë: “Kur bëhet fjalë për qendrat, ose sido që të quhen ato, e kam thënë dhe e përsëris: kurrë në Shqipëri.”
