Redaksionale
Procesi i Vettingut, i nisur për të pastruar sistemin e drejtësisë nga korrupsioni dhe lidhjet e dyshimta, po përballet me një hije të rëndë dyshimesh që kërcënojnë besimin e publikut. Në qendër të këtyre shqetësimeve është Komisioni i Posaçëm i Apelimit (KPA), ku disa vendime duket se kanë devijuar nga parimet e drejtësisë.
Këto dyshime lidhen me ndikime të mundshme nga individë strategjikë dhe biznesmenë të fuqishëm, të cilët, sipas disa burimeve, kanë ndërhyrë për të mbrojtur interesat e tyre ose të personave të lidhur me ta në sistemin e drejtësisë. Për më tepër, emri i Ina Ramës, një figure kyçe brenda sistemit, është përfshirë në këto spekulime, duke ngritur pyetje serioze mbi transparencën dhe integritetin e KPA-së.
Bomba e dyshimeve ka shpërthyer pas raportimeve se disa dosje janë manipuluar apo vonuar qëllimisht në këmbim të garancive për moslargim nga sistemi i drejtësisë. Nga ana tjetër rasti i emërimit të Olsi Dado nga noter në prokuror, është një tjetër shkelje e bërë nga anëtarët e vetingut me në krye Ina Ramën, mikeshën e ngushtë e Dados.
Dado nuk kishte shkollën e Magjistraturës por në kohën kur ai u emërua prokuror nuk ishte kriter, por sipas ligjit kriter ishte që një noter s’mund të emërohej prokuror, këtë detyrim ligjor Ina Rama e anashkaloi, kurse prokurori Dado nuk e përmendi fare.
Nëse këto pretendime janë të vërteta, atëherë kemi të bëjmë me një krizë të rëndë morale dhe ligjore që kërkon një hetim të thellë dhe të pavarur.
Është jetike që të hetohen të gjitha dosjet e KPA-së pa përjashtim. Çdo vendim duhet të rishqyrtohet, dhe nëse dalin prova për manipulim, përgjegjësit duhet të mbajnë përgjegjësi të plotë ligjore. Sistemi i drejtësisë nuk mund të lejojë që njerëzit që duhet të mbrojnë ligjin të bëhen shkelësit e tij më të mëdhenj.
Kjo situatë kërkon një reagim të fuqishëm nga institucionet ndërkombëtare që kanë mbështetur reformën në drejtësi. Reforma nuk duhet të kthehet në një fasadë për të mbuluar korrupsionin dhe abuzimet e reja. Publiku shqiptar ka sakrifikuar shumë për këtë reformë dhe ka të drejtë të kërkojë drejtësi të vërtetë.
Drejtësia nuk mund të jetë në ankand. Çdo ditë që këto dyshime mbeten pa përgjigje, dëmtohet më tej besimi i qytetarëve tek shteti dhe ligji. Shqiptarët nuk meritojnë një drejtësi që shërben interesave të biznesmenëve apo strategëve të prapaskenës, por një drejtësi që shërben qytetarit dhe kombit.
Koha për të vepruar është tani! Hetoni Ina Ramën dhe KPA-në, para se drejtësia të humbasë kuptimin e saj./Ekskluzive.al
