Këshilli Kombëtar i Territorit prej vitesh rezulton se mblidhen vetëm për të finalizuar pazaret që bëhen nëpër cartera, resorte, zyra dhe ballkone, duke ndarë pasuritë dhe paratë publike, si dhe duke miratuar leje për kulla dhe resorte, me të cilat pastrohen paratë e korrupsionit, evazionit fiskal dhe trafiqeve.
Në një nga mbledhjet e KKT, është miratuar ndërtimi i një kulle me 40 kate te diga e Liqenit Artificial në Tiranë.
Kulla që përfshin strukturë shërbimi, hoteleri dhe banimi 2-6 kate dhe 40 kate mbi tokë, me 5 kate nëntokë, do të ndërtohet nga kompania Green Living Company, në rrugën Kristo Luarasi.
Në momentin e miratimit të lejes së ndërtimit të kullës nga KKT, pronare me 65 % të aksioneve të kompanisë Green Living Company ishte Natasha Xhai, një personazh misterioz.
Paratë e dyshimta duket se i lëviz i biri Klevens Toka. Madje në një rast, siç tregon ky dokument, Natasha Xhai i ka dhënë Klevens Tokës 450 mijë euro, para që nuk u dihet burimi, ashtu siç nuk dihet burimi i parave për ndërtimin e kullës, ku vetëm për të paguar taksën e ndërtimit duhen mbi 8 milionë euro.
Kompania e ndërtimit Green Living Company, me kapital 1 milionë lekë, me adresë Rruga e Kosovarëve Tiranë, është themeluar në vitin 2008 nga Ed Manushi, i njohur si ‘kodoshi’ i Arben Ahmetajt, madje i thirrur në SPAK për udhëtimet me Ahmetajn.
Në vitin 2009 del në skenë Natasha Xhai, e cila i blen Manushit 70 % të aksioneve të kompanisë.
Kompania pezullon aktivitetin dy vite më vonë, në vitin 2009 deri në vitin 2022.
Në vitin 2023, kompania pa bilance, pa kapital dhe pa aktivitet merr leje për kullë te Diga e Liqenit. Natasha Xhai rezulton me 65 % aksioneve, ndërsa Edi Manushi ka dalë nga loja.
35 % të aksioneve i ka blerë Orion Cenalla, një personazh, emri i të cilit del shpesh në dosjet e kullave në Tiranë, si ortak i Alban Efthimit.
Pasi merret leja për kullën, largohet formalisht ortaku Orion Cenalla, duke u maskuar pas kompanisë Daton. 50 % të aksioneve i mbeten Natasha Xhait, ndërsa 50 % të aksioneve i marrin dy kompani Daton (25 %) dhe Texas Development (25 %).
Administrator dhe ortak i vetëm i shoqërisë Daton është Orion Cenalla. Kompania me kapital 100 lekë ka si objekt parësor import eksport dhe tregtim me shumicë dhe pakicë të mallrave të ndryshme me karakter industrial, ushqimore, etj.
Ndërkaq, pas kompanisë Texas Development, themeluar në 2019 dhe me kapital 100 lekë qëndron Alban Efthimi. Ky i fudit e kontrollon Texas Development përmes kompanisë Zurich Investment Group, me adresë te Rruga e Kosovarëve, themeluar në vitin 2021, me kapital 100 lekë.
Alban Eftimi njihet si mik dhe një prej bashkëpunëtorëve më të afërt të Edi Ramës, që në kohën kur ai drejtonte Bashkinë e Tiranës.
Eftimi ka mbajtur detyrën e Drejtorit të Planifikimit Urban të Tiranës, gjatë mandateve të Edi Ramës në krye të Bashkisë së kryeqytetit.
Emri i tij ka qenë ndër më të lakuarit gjatë një Komisioni Hetimor Parlamentar, të zhvilluar në vitin 2012, si një ndër përfituesit më të mëdhenj të lejeve të ndërtimit nga Bashkia e Tiranës gjatë drejtimit të Ramës.
Raporti i ngushtë midis ndërtuesit Alban Eftimi dhe Edi Ramës vijoi ngushtësisht edhe kur ky i fundit u zgjodh kryeministër, në Shtator të vitit 2013.
Pas shumë kullash që po ndërtohen në Tiranë qëndron pikërisht Alban Eftimi, duke u kthyer në simbol i këtij sekstori, i cili sipas SPAK, SHISH, Drejtorisë për Parandalimin e Pastrimit të Parave dhe raporteve ndërkombëtare mbetet sektori kryesor ku investohen paratë e pista.
