Ndodhet në një nga hapësirat më të bukura kodrinore të Kukësit, quhet Kodra e Hazirëve. Kodër e cila përpara se të ndërtohej hoteli i ri, mbante mbi lëkurë shtëpitë e pronarëve të tokës.
Shtëpi që u prishën, për të hapur rrugë shkëlqimit të ri! Mirë ato ikën e u shuan e pronarët nisën ca halle më shumë po ky hotel pse pati kaq pak fat?
Mund të ishte ende sot hoteli më i bukur alpin në Shqipëri! Por fati e deshi që as ish-Hotel Turizmi i Ri në Kukës mos të jetonte gjatë. E projektoi Valentina Pistoli, viti 1971. Diku në fund të vitit 1988, 31 Dhjetor përurohet! Kuptohet, ishin vite të vështira. Hoteli, jetoi deri para pak fillimit të luftës jo edhe aq njerëzore të vitit 1997.
Eljan Tanini bisedoi në Kukës me: Ramazan Memishin, Artist-Piktor. Artisti Memishi është nga artistët e rëndësishëm që ka punuar në këtë Ish Hotel prej Turizmi të Ri një vepër të madhe në hapësirë! Gjithashtu, takohem edhe me Kujtim Shehun, Ish Drejtues i Turizmit të Ri të Kukësit, një nga drejtuesit më jetë gjatë por edhe më ekonomik për nga natyra dhe filozofia e punës së tij.
Eljan Tanini: -Duket natyra e punës suaj! Ju keni pikturuar një pjesë të mirë të muraleve që gjenden në këtë hotel tashmë të braktisur. Cila është historia e tyre? Si u pikturuan ato?
Ramazan Memishi: Janë pikturuar në fund të sistemit, te llozhat e bar kafesë por edhe te restoranti. Janë motive baritore në gjelbërim të cilat sikur u demotivuan pak në fillim kur u krijuan sepse personat e partisë u kishin vënë syrin për keq, donin që të fshiheshin! Kot! Kishin edhe probleme me ngjyrat!
Sipas tyre malësorët e pikturuar këtu, kishin motive gorane dhe jo shqiptare. Gjë që nuk ishte aspak e vërtetë. Këto ishin justifikime. Janë pikturuar për një kohë të gjatë me akrilik, ku sipërfaqja e tyre është pak e ashpër dhe të gjata në këtë hyrje të hotelit por edhe te restoranti. Pastaj me degradimin e hotelit nisën edhe ato të marrin fund. Duken ende mbahen mirë, nuk i ka gjetur asgjë përveç se prishur nga dora e njeriut.
Më pas takohem me një nga punonjësit më të njohur të këtij hoteli, hotel për të cilin kanë nostalgji të gjithë.
Eljan Tanini: -Çfarë ishte ky hotel që tregonte jetën dhe stilin e kohës së tij?
Kujtim Shehu: -Dikur pronë e Albturist, ishte krenari, besoj se ishte investimi i fundit i shtetit edhe me ashensor, kuzhina të mira, dyqan, berber, sistem ngrohës kaldaje, dhe me punonjës tepër të mirë. Megjithëse shteti nuk e kishte prioritet turizmin, prapë ky hotel u ngrit. Kemi pasur rreth 3000 e ca turistë në vit. Unë kam punuar këtu prej vitit 1992. Gjithmonë kishim turistë nga Kosova por edhe më gjerë, kishim ngritur ekonominë tonë, mund ta mbanim atë për disa vite. Kishim gjithashtu edhe turistë perëndimorë ku shpesh herë u bënim gjëra të veçanta. Ky hotel ka pasur edhe dhoma me dhe pa banjo!
Çifte të reja nga Tirana vinin këtu për muaj mjalti! Kishim 170 punonjës dhe rreth 90 shtretër. Hoteli gjatë Luftës së Kosovës shërbeu edhe për të pasur zyrat aty disa organizata ndërkombëtare, më pas u mbyll! Kemi luajtur muzikë live thuajse çdo ditë! Brenda edhe jashtë hotelit, kanë luajtur edhe këngëtarë me shumë emër. /Eljan Tanini
