Zbardhen procedurat e plota që do të ndiqen për arrestimin e deputetëve dhe ministrave. Të enjten Kuvendi i Shqipërisë miratoi ndryshimet e rregullores, duke sjellë mjaft surpriza. Gjatë diskutimeve në komisionet parlamentare, kjo rregullore u mbajt hermetike, por tashmë që u miratua kanë dalë në pah ndryshimet. Por neni më i debatuar është nenin 69, i cili ndryshon nenin 118 dhe që ka lidhje me arrestimin e deputetëve dhe ministrave, të cilët tanimë nuk kanë më imunitet dhe mund të hetohen lehtësisht nga organi i akuzës.
Kështu, në nenin 69 thuhet se procedura që do të ndiqet për arrestimin e zyrtarëve të sipër përmendur nuk do të jetë më 4 javë sikundër ishte në rregulloren e vjetër, por 2 javë. Pra, nëse prokuroria i drejtohet Kuvendi, duke i kërkuar dhënien e autorizimit për të arrestuar deputetin ose ministrin mbi të cilët rëndojnë akuza, nuk duhet të presin më 4 javë për ta marrë autorizimin por 2 javë. “Në përfundim të shqyrtimit, Këshilli, brenda 2 (dy javëve), harton një raport për në seancë plenare, në të cilin rekomandon rrëzimin ose miratimin e dhënies së autorizimit për caktimin e masës së sigurimit të arrestit në burg ose në shtëpi, ose heqjes së lirisë në çfarëdo lloj forme, apo kontrollit personal ose të banesës. Raporti i Këshillit u shpërndahet deputetëve; Shqyrtimi i kërkesës për caktimin e masës së sigurimit të arrestit në burg ose në shtëpi, heqjes së lirisë në çfarëdo lloj forme, apo të kontrollit personal ose të banesës të një deputeti vendoset si pikë e parë e rendit të ditës të seancës pasardhëse, pas paraqitjes së raportit të Këshillit për Rregulloren, Mandatet dhe Imunitetin. Në seancë plenare fjala i jepet në fillim deputetit, ndaj të cilit është paraqitur kërkesa, për të dhënë shpjegime ose për t’iu përgjigjur pyetjeve të deputetëve”, thuhet në rregullore.
Hiqet roli i kryeprokurorit
Por një tjetër fakt interesant është se me miratimin e Rregullores së re të Kuvendit, atributin për të kërkuar arrestimin e një deputeti ose ministri nuk e ka më kryeprokurori por këtë të drejtë e gëzon edhe prokurori. Me ligjin e ri të reformës në drejtësi të drejtën për të hetuar zyrtarët e lartë, sikundër janë ministrat, Presidenti, kryeministri apo deputeti e ka Prokuroria Speciale Anti-korrupsion, e cila njihet ndryshe me emrin SPAK. Kështu, në nenin 69 të rregullores thuhet se i është hequr e drejta kryeprokurorit për të kërkuar arrestimin e deputetit, por këtë mund ta kërkojë edhe një prokuror i thjeshtë, që në rastin konkret do jetë prokuror i SPAK. Pra, neni 69 ndryshon nenin 118 të rregullores së vjetër, në të cilën thuhet se arrestimin e deputeti e kërkon vetëm kryeprokurori. Ndërkohë që, situata tani ka ndryshuar. Thënë më troç nëse një prokuror i SPAK e shikon të arsyeshme të kërkojë arrestimin e deputetit ai mund ta bëjë në çdo kohë, duke kërkuar autorizim nga kryetari i Kuvendit të Shqipërisë. “Kërkesa dhe dokumentet shoqëruese për dhënien e autorizimit për caktimin e masës së sigurimit të arrestit në burg ose në shtëpi, ose heqjes së lirisë në çfarëdo lloj forme, për kontrollin personal ose të banesës, i paraqitet Kryetarit të Kuvendit nga Prokurori. Kryetari ia dërgon kërkesën dhe dokumentet shoqëruese menjëherë për shqyrtim Këshillit për Rregulloren, Imunitetin dhe Mandatet dhe vë në dijeni deputetin. Deputeti, për të cilin kërkohet dhënia e autorizimit, lajmërohet për kërkesën e bërë dhe dokumentet që e shoqërojnë atë, si dhe i bëhet e ditur koha në të cilën Këshilli për Rregulloren, Mandatet dhe Imunitetin do të fillojë shqyrtimin e kërkesës”, thuhet në Rregulloren e re të Kuvendit.
Rigels Seliman
