Gjykata ka shpëtuar përfundimisht kryedemokratin Lulzim Basha.
Gjyqtari Lazër Sallaku ka dhënë vendimin për pushimin e çështjes së ngritur nga prokuroria ndaj kryetarit të PD-së, Lulzim Basha, ish-sekretarit të Përgjithshëm, Arben Ristani dhe financierit të PD-së, Ilir Dervishi.
Akuza e paraqitur nga Prokuroria për falsifikim dokumentesh është cilësuar nga gjyqtari si e pabazuar dhe për këtë e ka pushuar këtë çështje.
Mësohet se prokurorët e çështjes kanë pasur qëndrime të ndryshme.
Ashtu si edhe një muaj më parë përplasja mes prokurorëve vijoi edhe seancën e sotme.
Me kërkesë të drejtueses së Prokurorisë së Tiranës, Elisabeta Imeraj, u kërkua përjashtimi i prokurorit Ervin Karanxha, që gjyqtari e miratoi, ndërsa dy prokurorët e tjerë që ishin të pranishëm Gjergji Tako dhe Kolë Hysenaj ishin të ndarë.
Hysenaj kërkoi shtyrjen e afateve me qëllim pyetjen e lobistit Nick Muzin, ndërsa Tako dërgimin e cështjes në gjyq.
Ish-sekretari i Përgjithshëm i PD-së, Arben Ristani u shpreh se:
“Gjykata vendosi të pushojë çështjen sepse fakti nuk ekziston, janë vendime normale. Është shumë interesante për median e publikut, ku instituiconet bëhen pre e frustimit dhe dhunës politike, në ktë rast ishte prokuroria, Prokuroria u paraqit me dy qëndrime, një që të shkonte në gjyq dhe të kthehej për plotësim, e ndërsa gjatë gjyqit vjen vendimi për përjashtim. Pra kemi një prokurori të ç’organizuar”.
Ai e cilësoi si qesharake formulimin e akuzës së Prokurorisë, ku sipas tij, nuk ka asnjë akuzë që ekziston “falsifikim për mos veprim”.
“Unë ju thashë është një akuzë e montuar politikisht që u provua, kanë qenë veprime ligjore nga ana e PD-së, dhe mesa duket se sado të ndikojnë tek drejtësia do ketë njerëz që do japin drejtësi.
Kjo është ajo që i mungon kjo popullit shqiptar. Ka paguar para që rrjedhin ga buxheti i saj që i ka deklaruar. Le t’i turpërojmë këta prokuror që falsifikim me mosveprim, si mund të ndodh kjo gjë.
Nik Muzin s’ka pse kërkon garanci këtu, por shtetit të vetë. Po të kishte të dhëna shteti vet do e kishte marrë në shqyrtim”, tha Ristani.
Ai theksoi se preferoi të zbatojë jetë prezent në gjyq, pasi këtë ka pasur si përvojë si avokat, e gjyqtar, ndërsa kësaj here ka një përballje si i pandehur.
Pas Ristanit, vendimin e komentoi edhe avokati i Bashës, ish-ministri i Drejtësisë, Eduard Halimi, i cili e cilësoi si një fitore të drejtësisë.
“Gjithçka ishte akuzë e sajuar. Nga dy vite hetime nuk kishte asnjë lidhje PD-ja dhe zyrtarët e saj, as në Shqipëri dhe as në një vend tjetër. Vepra penale dhe fakti nuk ekzistonte. Vendimi i sotëm ishte një vendim drejtësie për t’u përshëndetur.
Ne jemi avokatët. Ky ishte një vendim që rrëzoi të gjithë gjuetinë e shtrigave. U rrëzuan të gjitha akuzat ndaj PD-së. Është pushuar akuza, fakti nuk ekziston” tha ai.
Referuar nenit 190 të Kodit Penal në veprën penale të parashikuar në paragrafin e tretë mbi bazën e të cilit akuzohen tre të pandehurit, kjo vepër penale dënohet me burgim nga gjashtë muaj deri në pesë vjet.
Basha dhe Dervishi nuk ishin të pranishëm në seacën e sotme gjyqësore. Ata preferuan të mbroheshin nga avokatët. Ndërsa pritet zbardhja e vendimit të plotë të gjyqtarit për këtë çështje, duhet pritur edhe në Prokuroria do ta ankimojë ose jo një vendim të tillë.
Prokuroria nisi hetimet për pastrim parash, por gjatë rrugës e degradoi dosjen, dhe në gjykatë çoi vetëm akuzën për falsifikim dokumentesh.
Akuzë që dhe këtë, nuk e mbrojti dot në gjykatë, duke e nxjerrë kështu të pafajshëm Lulzim Bashëm, edhe pse ky I fundit nuk justifikon dot qindra mijëra euro që ka paguar tek disa lobistë rusë në SHBA.(TemA)
