Vuloset shkarkimi i presidentit Ilir Meta nga detyra. Ditën e djeshme Komisioni Hetimor parlamentar “Për hetimin e shkeljeve të rënda kushtetuese nga Presidenti i Republikës së Shqipërisë” zhvilloi mbledhjen e tij të radhës, ndërsa mbylli procesin hetimor për presidentin Meta.
Fillimisht, Komisioni Hetimor “Meta 2” miratoi dje me shumicën e anëtarëve procesverbalin e mbledhjes së Komisionit të datës 21 maj 2021, ndërsa kryetari i komisionit, Alket Hyseni bëri me dije se brenda kësaj jave do të mbahet një tjetër mbledhje, teksa do të miratohet raporti final që do të shkojë për votim në Kuvendin e Shqipërisë.
Sipas informacioneve nga Komisioni Hetimor, mësohet se raporti do të shkojë brenda kësaj jave për votim në Parlament dhe më pas ky i fundit me shumë gjasa do të mblidhet në javën e parë të qershorit për të vendosur me votë nëse do të shkarkojë apo jo presidentin Ilir Meta. Pak ditë më parë gazeta publikoi detaje nga dosja me 41 faqe që Partia Socialiste do të përdorë si “armë” kundër presidentit Meta, ndërkohë që sot po sjell për lexuesin 27 provat kundër kreut të shtetit që do të përdoren për të bindur Kuvendin e Shqipërisë që të shkarkojë kreun e shtetit.
Zbardhen 27 provat kundër presidentit
Kështu, festivalin e 27 provave që ka siguruar gazeta e hap kërkesa e 49 deputetëve për shkarkimin e presidentit Ilir Meta nga detyra. Më pas si provë Komisioni Hetimor ka administruar edhe njoftimin e Komisionit të Ligjeve, i cili thirri presidentin Meta për të dëshmuar dhe përgjigjen që kreu i shtetit u dërgoi deputetëve të “Ligjeve”.
Po ashtu, mes provave që komisioni hetimor ka kundër Metës, janë edhe regjistrimet e programeve të transmetuara në lidhje me deklaratat e Metës, që janë dërguar nga Autoriteti i Mediave Audiovizive dhe që janë plot 27 në format CD, ku shihen me zë dhe figurë deklaratat dhe thirrjet për kaos të bërë nga kreu i shtetit.
Nga ana tjetër, si provë Komisioni Hetimor ka administruar edhe informacionin e dërguar nga Gjykata Kushtetuese mbi korrespodencën me Presidentin e Republikës gjatë periudhës objekt hetimi dhe informacionet që Prokuroria e Përgjithshme ka vënë në dispozicion për komisionin sa u takon veprave penale apo kallëzimeve të regjistruara lidhur me zgjedhjet për periudhën para dhe gjatë fushës zgjedhore të zgjedhjeve parlamentare të 25 prillit 2021.
Ndërkaq, një tjetër provë është edhe informacioni që Struktura e Posaçme Kundër Krimit të Organizuar dhe Korrupsionit i ka vënë në dispozicion gjatë hetimit Komisionit Hetimor sa u takon veprave penale apo kallëzimet e regjistruara në periudhën objekt hetimi, si informacionin e dërguar nga SHISH lidhur me objektin e hetimit të komisionit hetimor “Meta 2”.
Ndërkohë, interesant është fakti se Komisioni Hetimor mes 27 provave ka edhe informacionin që i është vënë në dispozicion nga Shërbimi Kërkimor pranë Kuvendit të Shqipërisë mbi shkarkimin e Presidentit të Republikës në Lituani, i cili mesa duket se do të ndihmojë komisionin për të fundosur presidentin Ilir Meta. Po ashtu, si provë kundër Metës është konsideruar edhe kërkesa për informacion drejtuar Institucionit të Presidentit të Republikës lidhur me dekoratat e akorduara nga presidenti Ilir Meta dhe letra e kreut të shtetit drejtuar Komisionit Hetimor “Meta 2” dhe kryetarit të Kuvendit, i cili sulmon Parlamentin dhe e quan ilegjitim.
Bushka: T’i shkojmë deri në fund hetimit
Megjithatë në lidhje me shkarkimin dhe hetimin e presidentit Ilir Meta, dje në mbledhje kanë folur edhe anëtarët e Komisionit Hetimor. Gjatë fjalës së saj para Komisionit Hetimor “Meta 2”, deputetja e Partisë Socialiste, Klotilda Bushka, u shpreh e vendosur që mazhoranca do t’i shkojë deri në fund shkarkimit të Metës nga detyra.
“Ne si komision hetimor mund ta thërresim me forcë sipas ligjit presidentin Ilir Meta për të qenë i pranishëm në dëgjesë, po duke qenë se ne e bëmë procedurën e plotë për ta thirrur dhe ai s’ka vullnet për të ardhur ne duhet të vijojmë me mbylljen e hetimit”, deklaroi ajo. Më herët, deputetja Bushka akuzoi presidentin Ilir Meta se ka kryer shkelje të rënda kushtetuese, ndër të cilat favorizimi i opozitës dhe denigrimi i mazhorancës. Po ashtu, ajo theksoi se me deklaratat e tij, presidenti Meta ka denigruar kryeministrin, figura të mazhorancës, përfaqësues të huaj apo reputacionin ndërkombëtar të Shqipërisë./Rigels Seliman
