Partia Demokratike do të mbajë më 28 shkurt protestën e radhës në Tiranë kundër kryeministrit Edi Rama. Vendimi i marrë nga Sali Berisha vjen afro 24 orë pas protestës së dhunshme dhe vandalizmit karakteristik që militantët e tij shfaqën dje në kryeqytet.
Përmes një mesazhi në rrjetin social Whatsapp të siguruar nga gazetarja Danjela Maloku, Berisha i drejtohet kryetarëve të strukturave të Partisë Demokratike, anëtarëve demokratë në Këshillat Bashkiak të vendit dhe anëtarëve të Këshillit Kombëtar, ku i njofton për vendimin e marrë nga ai personalisht.
Molotovët, fishekzjarret dhe gurët që përdorën militantët e tij gjatë protestës së djeshme kundër punonjësve të policisë, institucioneve shtetërore, por edhe ndaj xhamisë së Namazgjasë ndëkohë që dhjetëra besimtarë myslimanë faleshin në këtë muaj të shenjtë të Ramazanit, Berisha e quan një tjetër sukses të Partisë Demokratike.
“Ndaj, duke filluar nga nesër, me energjinë dhe frymëzimin e 20 shkurtit, të nisim me përkushtim betejën e ardhshme! Të trokasin në çdo derë, në çdo lagje, bllok, rrugë e rrugicë, në çdo fshat e qendër pune, për të garantuar pjesëmarrjen më masive të shqiptarëve në protestën e ditës së shtunë, më datë 28 shkurt”,- u kërkon Berisha funksionarëve dhe përfaqësuesve të Partisë Demokratike.
