Eliminimi i Kombëtares së Kosovës nga rruga drejt Botërorit 2026, pas humbjes kundër Turqisë, është shndërruar në një temë kryesore për mediat serbe (si Novosti apo Informer). Ato po e portretizojnë këtë dështim sportiv si një “tërmet të brendshëm” dhe një dëshmi të thyerjes së unitetit brenda kampit dardan.
Sipas raportimeve serbe, fokusi kryesor i skandalit është sulmuesi kryesor, Vedat Muriqi. Mediat serbe shkruajnë me tone sensacionale se si kapiteni i Kosovës është akuzuar publikisht për “tradhti”. Ato i referohen debateve në mediat shqiptare ku Muriqi u vu në shënjestër për shkak të:
Origjinës dhe gjuhës: Fakti që ai flet turqisht dhe është nga Prizreni është përdorur si “provë” për besnikëri të dyfishtë. Pasaporta turke dhe karriera e tij e gjatë në Stamboll janë cituar si arsye pse ai “mund të ketë shitur” informacione te kundërshtari.
Gazetat serbe e kanë cituar gjerësisht reagimin shpërthyes të Muriqit në rrjetet sociale, duke vënë theksin te fjalët e tij: (Turp të kesh!). Ato e përshkruajnë sulmuesin si të “thyer shpirtërisht” nga akuzat e bashkëkombësve të tij, pavarësisht gjithçka që ka dhënë për atë fanellë.
Ato po ashtu vënë në dukje se Muriqi ka marrëdhënie të shkëlqyera me lojtarët serbë në Evropë (si Rajkoviq te Mallorca), duke lënë të kuptohet se ai po “sulmohet nga të tijtë” ndërsa respektohet nga “rivalët”.
Mediat serbe raportojnë edhe për ndërhyrjen emergjente të FFK-së, e cila doli në mbrojtje të lojtarit. Megjithatë, ato e kornizojnë këtë si një përpjekje të dështuar për të fshehur “kaosin dhe urrejtjen” që ka shpërthyer pas humbjes në fushën e lojës./Mapo.al
